बिजवडी (जि. सातारा) : जिल्हा परिषदेच्या प्राथमिक शिक्षण विभागाने शिक्षकांच्या केलेल्या बदल्यांत अनियमितता आणि भ्रष्टाचार झाल्याची तक्रार आमदार जयकुमार गोरे यांनी लेखी शिक्षणमंत्र्यांकडे केली होती. या तक्रारीची तत्काळ दखल घेत शालेय शिक्षणमंत्री वर्षा गायकवाड यांनी चौकशी करून अहवाल सादर करण्याचे आदेश दिल्याने जिल्ह्याच्या प्राथमिक शिक्षण विभागात खळबळ उडाली आहे. 

जिल्हा परिषद शिक्षकांच्या जिल्हांतर्गत बदल्या संगणकीय प्रणालीद्वारे करण्याबाबत फेब्रुवारी 2017 मध्ये शासनाने धोरणात्मक निर्णय घेतला होता. सर्व शिक्षकांच्या बदल्या त्यांच्या सोयीनुसार मानवी हस्तक्षेपाशिवाय आणि पारदर्शीपणे करण्याच्या सक्त सूचना देण्यात आल्या होत्या. या शासन निर्णयाद्वारे संवर्ग 1, संवर्ग 2, संवर्ग 3 आणि संवर्ग 4 असे भाग करून प्रत्येक संवर्गामध्ये कोणते शिक्षक बदलीपात्र ठरतात. या बाबतीत मार्गदर्शक तत्त्वे निश्‍चित करण्यात आली होती. 

अध्यादेश काढा; अन्यथा परिणामाला सामोरे जा; उदयनराजेंचा महाविकास ला इशारा

जे शिक्षक बदलीपात्र ठरतील. त्यांच्याच या बदली प्रक्रियेमध्ये समावेश करण्याचे आदेश देण्यात आले होते. शासनाने या वर्षी प्रशासकीय बदल्या रद्द करून फक्त विनंती बदल्या कराव्यात, असा आदेश 5 जुलैच्या पत्राद्वारे देण्यात आला आहे. जिल्हा परिषदेने या वर्षी शिक्षकांच्या जिल्हांतर्गत बदल्या 10 ऑगस्ट रोजी केल्या आहेत. या बदल्या करताना जिल्हा परिषदेने फेब्रुवारी 2017 चा शासन निर्णय आणि त्यानंतर याबाबत आलेली परिपत्रके, निर्णयांचा भंग केला आहे. 

जिल्हा शल्यचिकित्सकांकडून पदाधिका-यांना हमी; मंत्री मुश्रीफांच्या निर्णयाकडे लक्ष!

न्यायालयाचा आदेश आहे, असे सांगून 12 शिक्षकांच्या बदल्या करण्यात आल्या आहेत. या चुकीच्या आणि नियमबाह्य बदल्या कशाच्या आधारे केल्या, याची चौकशी करून दोषींवर कडक कारवाई करावी, या आशयाचे पत्र आमदार गोरे यांनी मंत्री गायकवाड यांना दिले होते. मंत्री गायकवाड यांनी या पत्राची दखल घेऊन जिल्हा परिषदेच्या प्राथमिक शिक्षण विभागाने राबविलेल्या बदली प्रक्रियेची तत्काळ चौकशी करुन अहवाल सादर करण्याचा आदेश दिल्याने शिक्षण विभागात खळबळ उडाली आहे. 

संपादन : बाळकृष्ण मधाळे