शेणोली : रेठरे खुर्द येथे १५० वर्षांपूर्वी कृष्णा नदीतील (Krishna River) नावेतून प्रवास करणाऱ्या प्रवाशांच्या निवासाची सोय असलेली धर्मशाळा (Dharamshala) अखेरची घटका मोजत आहे. इमारत पुरातन असल्याने ब्रिटिशांनी बांधकाम भक्कम केले आहे. त्यामुळे १५० वर्षांचा कालावधी उलटूनही इमारत उभी असल्याने तिच्या रूपाने इतिहासाची पाऊलखुणा ऐतिहासिक ठरत आहे.

सध्या या धर्मशाळेला अखेरची घरघर लागली आहे. जवळच कृष्णा नदीवर सध्या उंच पूल बांधणीचे काम सुरू आहे. या कामात धर्मशाळेचे अस्तित्व धोक्यात येणार की काय? अशी भीती व्यक्त होत आहे. गावाजवळून कृष्णा नदी दुथडी भरून वाहते. १९५० च्या दशकात नदीवर लाकडी पूल होता.

त्याआधी नावेच्या साहाय्याने नदीतून ये- जा केली जायची. त्यावेळी रात्री उशीर झाल्यास लोकांना निवासाची सोय असावी, यासाठी ब्रिटिशांनी या धर्मशाळेची बांधणी केली असावी, असे गावातील ज्येष्‍ठ लोक सांगतात. दिवसभर रेठरे खुर्द व रेठरे बुद्रुक येथील नदीकाठावर आलेले लोक नदीतून अलीकडे- पलीकडे प्रवास करायचे.

कालांतराने प्रख्यात जलतज्ज्ञ सदुभाऊ पाटील यांच्या अभ्यासातून तेथे लाकडी पुलाची उभारणी झाली. त्या पुलावरून यशवंतराव मोहिते कृष्णा सहकारी साखर कारखान्याची ऊस वाहतूक धावेच्या बैलगाडीतून व्हायची. त्यावेळेस लोकांचा प्रवास पुलावरून व्हायचा; परंतु हा पूल पावसाळ्यात उपयुक्त ठरत नव्हता. माजी मंत्री यशवंतराव मोहिते यांनी नदीवर पक्का पूल केल्यानंतर लाकडी पूल व नदीतील नावेतून होणारा प्रवास कालबाह्य झाला.

४५ कोटी खर्चातून पूल..

माजी मुख्यमंत्री आमदार पृथ्वीराज चव्हाण यांच्या माध्यमातून सुमारे ४५ कोटी रुपये खर्चातून होणाऱ्या नवीन पुलाचे काम गतीने सुरू आहे. या कामाजवळ नदीकाठी धर्मशाळेची इमारत आहे व तिला अखेरची घरघर लागली आहे. पुलाच्या कामामध्ये ही धर्मशाळा नाहीशी होणार की काय? याची भीती आहे.