सातारा : कोरोनाच्या सर्व्हेसाठी आल्याचे सांगून जबरदस्तीने घरात घुसून पिस्टलचा धाक दाखवत दरोडा टाकल्याप्रकरणी महिलेसह चौघांना सातारा शहर पोलिसांनी रात्री उशीरा अटक केली. महेंद्र रामदास मारणे, रुपाली दत्तात्रय टेमगिरे, (रा. हडपसर पुणे), सोमनाथ अंकुश सातव (रा. मांजरी बुद्रुक, पुणे) आणि युवराज यशवंत शिंदे (रा. हडपसर) अशी संबंधित संशयितांची नावे आहेत. तर गोविंद रामदास मारणे (रा. हडपसर) हा फरार असल्याचे पोलिसांनी सांगितले. 

यासंदर्भात सातारा शहर पोलिसांत श्रीकांत विठ्ठल बिल्लंमपल्ली यांनी फिर्याद दिली आहे. बिल्लंमपल्ली हे निवृत्त आरटीओ कर्मचारी असून ते साताऱ्यातील रविवार पेठेत यशोदीप अपॉर्टमेंटमध्ये राहतात. शुक्रवार (ता. 28) रोजी त्यांच्या घराची बेल वाजवत एक महिला व सोबत एक पुरूष यांनी आम्ही वैद्यकीय पथकातील असून कोरोनाची माहिती घेण्यास आल्याचा बनाव करत घरात प्रवेश केला. यानंतर दरवाजा उघडाच असल्याने आणखी दोघांनी घरात प्रवेश करून बिल्लंमपल्ली यांना घरातील कोचवर पाडून तोंड दाबले.

दरोडा फसला अन् नागरिकांनी धु-धु धुतला! 

तसेच त्यांच्या गळ्यातील सोन्याची 80 हजारांची चेन जबरदस्तीने काढून घेतली. यावेळी त्यांनी आरडाओरडा केला तर त्यांच्या पत्नीने प्रतिकार केला. यामुळे आजूबाजूच्या नागरिकांनी महिलेसह तिघांना पकडून चोप दिला. पुणे पासिंगच्या कारमधून हे संशयित आले होते. त्यापैकी महिलेसह चौघांना पोलिसांनी अटक केली आहे. याप्रकरणी दरोड्याचा गुन्हा दाखल झाला करण्यात आला आहे. पोलिस उपनिरीक्षक एन. एम.कदम अधिक तपास करत आहेत. 

संपादन : बाळकृष्ण मधाळे