कऱ्हाड : भारताला ऑलिंपिकमध्ये पहिले वैयक्तिक कास्यपदक मिळवून देणारे जिल्ह्याचे भूमिपुत्र (पै.) खाशाबा जाधव यांना खास बाब म्हणून मरणोत्तर पद्मविभूषण पुरस्कार द्यावा, अशी मागणी खासदार श्रीनिवास पाटील यांनी पंतप्रधान नरेंद्र मोदी यांना पत्र लिहून केली आहे. राज्य सरकारनेही तशी शिफारस करावी, अशी मागणी पद्म पुरस्कार शिफारस समितीचे अध्यक्ष आदित्य ठाकरे यांच्याकडेही खासदार पाटील यांनी नुकतीच केली आहे. 

खासदार पाटील यांनी पत्रात म्हटले आहे की, सातारा लोकसभा मतदारसंघाच्या कऱ्हाड तालुक्‍यातील गोळेश्वर येथील (कै.) खाशाबा जाधव यांनी 1952 मध्ये फिनलंड देशाच्या हेलसिंकी शहरामध्ये आयोजित केलेल्या ऑलिम्पिक स्पर्धेत फ्रीस्टाइल बॅन्टमवेट कुस्तीमध्ये कास्यपदक मिळविले. त्यांच्या या कामगिरीने देशवासीयांची मने भरून गेली होती. केंद्र सरकारने 1952 मध्ये त्यांच्या नावाचे पोस्टाचे तिकिटही छापले होते.

पृथ्वीराज चव्हाण यांच्या ट्विटची होतीय चर्चा

2000 मध्ये क्रीडा क्षेत्रातील सर्वोच्च पुरस्कार अर्जुन अॅवॉर्ड देवूनही त्यांचा गौरव केला होता. खाशाबा जाधव यांनी त्याकाळी प्रशिक्षण, सोयी-सुविधांचा अभाव असूनही प्रतिकूल परिस्थितीत मात करत कामगिरी केली होती. त्यामुळे देशाचे नाव उज्ज्वल झाले होते. त्यांनी कुस्तीमध्ये मिळविलेले कास्यपदक 1952 पासून पुढील 44 वर्षे भारतासाठी मिळालेले एकमेव व्यक्तिगत पदक होते. 

कऱ्हाड पालिकेस पोर्टेबल ऑक्‍सिजन किट भेट 

राष्ट्राला दिलेली सेवा आणि कुस्ती क्षेत्रातील त्यांचे योगदान अतुलनीय आहे. नव्या पिढीसाठी प्रेरणादायी आहे. मागील अनेक वर्षांपासून त्यांना मरणोत्तर पद्मविभूषण पुरस्कार देऊन सन्मानित करावे, अशी मागणी नागरिक व क्रीडाप्रेमींमधून होत आहे. जीवनकाळातच पद्म पुरस्कार दिला जातो. परंतु, विशेष बाब म्हणून पुरस्कार दिला जावा. त्यांचा पद्मविभूषण पुरस्काराने मरणोत्तर सन्मान करण्यात यावा, अशी विनंती पंतप्रधान नरेंद्र मोदी यांना केली आहे. त्याबाबत राज्य सरकारनेही शिफारस करावी, अशी विनंती पद्म पुरस्कार शिफारस समितीचे अध्यक्ष आदित्य ठाकरे यांनाही खासदार पाटील यांनी केली आहे.  

संपादक : बाळकृष्ण मधाळे