कऱ्हाड (जि. सातारा) :  वेणूताई चव्हाण उपजिल्हा रुग्णालयातील सर्व 45 बेड तातडीने सुरु करावेत आणि रुग्णांची गैरसोय होणार नाही, याची दक्षता घ्यावी. त्याचबरोबर लोकांना अंगावर आजार न काढता तपासणीसाठी पुढे यावे, असे आवाहन पालकमंत्री बाळासाहेब पाटील यांनी आज (ता. ११) केले. 

कोरोनाचा प्रादुर्भाव रोखण्यासाठी केल्या जाणाऱ्या उपाययोजनांसंदर्भात पालकमंत्री श्री. पाटील यांनी शासकीय विश्रामगृहात तालुक्‍यातील आरोग्य अधिकारी, डॉक्‍टर यांच्याशी चर्चा करून सद्य परिस्थितीचा आढावा घेतला. तसेच ग्रामीण रुग्णालय व प्राथमिक आरोग्य केंद्रातील कोरोनासंदर्भातील अडीअडचणी पालकमंत्री पाटील यांनी जाऊन घेतल्या. यावेळी प्रांताधिकारी उत्तम दिघे, तहसीलदार अमरदीप वाकडे, तालुका वैद्यकीय अधिकारी डॉ. संगीता देशमुख यांच्यासह डॉक्‍टर, अधिकारी उपस्थित होते. 

जयकुमार गोरेंच्या मागणीची शिक्षणमंत्र्यांकडून दखल; शिक्षण विभागात खळबळ

पालकमंत्री पाटील म्हणाले, वेणूताई चव्हाण उपजिल्हा रुग्णालयात नव्याने 45 बेड तयार करण्यात आले आहेत. ते तातडीने सर्व बेड कार्यान्वित करावे. कोरोनाबाधितांची गैरसोय होणार नाही, याची दक्षता घ्यावी. अनेकजण अंगावर आजार काढत आहेत. त्यांना जास्त झाल्यावरच ते तपासणीसाठी येत आहेत. तसे न करता सर्वांनी काही लक्षणे असल्यास तातडीने तपासणी करुन उपचार घेतली पाहिजे. त्याच्या सर्व्हेसाठी येणाऱ्या आशांनाही माहिती द्यावी. 

अध्यादेश काढा; अन्यथा परिणामाला सामोरे जा; उदयनराजेंचा महाविकास ला इशारा

त्याचबरोबर कऱ्हाड, मलकापूर आणि ग्रामीण भागातील लोकांची तपासणी वाढवावी. होम आयसोलेशन आणि संपर्कातील व्यक्ती शोधण्यावर भर देण्यात यावा. त्यामुळे बाधितांची साखळी रोखता येईल. आरोग्य यंत्रणेने चांगले काम करुन लोकांना दिलासा द्यावा, असेही त्यांनी शेवटी सांगितले. दरम्यान, प्रांताधिकारी दिघे यांनी तालुक्‍यातील उपाययोजनासंदर्भात माहिती दिली. आरोग्य अधिकाऱ्यांनाही आत्तापर्यंत केलेल्या कामाची माहिती दिली. 

संपादन : बाळकृष्ण मधाळे