सातारा : राष्ट्रवादी काँग्रेस पक्षाची (NCP) राज्यात नव्याने संघटनात्मक बांधणी केली जाणार आहे. त्यासाठी पक्षाचे प्रदेशाध्यक्ष सुनील तटकरे (Sunil Tatkare) यांनी तयारी सुरू केली आहे. त्यासाठी पक्षाचे कार्याध्यक्ष प्रफुल्ल पटेल यांच्यासह पक्षाच्या प्रमुख नेत्यांवर जिल्हानिहाय जबाबदारी दिली आहे.

पश्चिम महाराष्ट्रातील पुणे, सातारा, सांगली व सोलापूर जिल्ह्याची जबाबदारी उपमुख्यमंत्री अजित पवार (Ajit Pawar) यांच्यावर दिली आहे. त्यामुळे बालेकिल्ल्यात पक्षाची पुन्हा नव्याने बांधणी होताना कोण अजित पवार गटात सहभागी होणार? याची उत्सुकता आहे.

अजित पवार हे ३७ आमदारांसह शिंदे, फडणवीस सरकारमध्ये सहभागी झाले. त्यानंतर जिल्ह्यातील राष्ट्रवादीत उभी फूट पडली. विधान परिषदेचे माजी सभापती रामराजे नाईक-निंबाळकर, मकरंद पाटील, दीपक चव्हाण यांच्यासह वाई, महाबळेश्वर, खंडाळा, फलटणसह इतर तालुक्यांतील प्रमुख पदाधिकारी दादांच्या गटात सहभागी झाले.

आता राष्ट्रवादीची विभागलेली ताकद पुन्हा वाढविणे गरजेचे आहे. आगामी निवडणुकांसाठी हे उपयुक्त असल्याने अजित पवार गटाचे प्रदेशाध्यक्ष सुनील तटकरे यांनी राज्यात राष्ट्रवादीची नव्याने संघटनात्मक बांधणी करण्याचा निर्णय घेतला. त्यासाठी जिल्हानिहाय नेत्यांकडे जबाबदारी दिली आहे. यामध्ये पश्चिम महाराष्ट्रातील सातारा, पुणे, सांगली व सोलापूर जिल्ह्याची जबाबदारी उपमुख्यमंत्री अजित पवार यांच्याकडे देण्यात आली आहे.

सातारा पक्षाचा बालेकिल्ला असून, आता अजितदादा स्वत: जिल्ह्यात लक्ष घालणार असल्याने जिल्ह्यातील कोण कोण त्यांच्या गळाला लागणार, याची उत्सुकता आहे. सध्या दोन आमदार व एक खासदार हे खासदार शरद पवार यांच्या गटासोबत आहेत. तसेच अद्यापही प्रमुख पदाधिकारी ही त्यांच्याचसोबत आहेत. त्यामुळे यातील कोण दादांच्या राष्ट्रवादीत सहभागी होणार, हे येणाऱ्या काळात दिसून येईल.