कास (सातारा) : शिवप्रतिष्ठान हिंदुस्थानचे संस्थापक संभाजी भिडे गुरुजी (Sambhaji Bhide) यांनी नुकतीच शिवसेनेचे नेते व नगरविकासमंत्री एकनाथ शिंदे (Minister Eknath Shinde) यांची त्यांच्या दरे (ता. महाबळेश्वर) गावी जाऊन भेट घेतली. काल खासदार उदयनराजेंनी (MP Udayanraje Bhosale) बोटीतून जाऊन मंत्री शिंदे यांची भेट घेतली होती. त्यानंतर लगेचच दुसऱ्या दिवशी भिडे गुरुजींनी भेट घेतल्याने राजकीय वर्तुळात खळबळ उडालीय.

खासदार उदयनराजे यांनी मराठा आरक्षण (Maratha Reservation) व सातारा शहरातील विविध विकासकामांसंदर्भात काल मंत्री एकनाथ शिंदे यांची भेट घेतली हाती. लगेचच दुसऱ्या दिवशी भिडे गुरुजी यांनी भेट घेतल्याने या दोन्ही भेटीतून काय घडणार याची चर्चा सुरू झाली आहे. याविषयी भिडे गुरुजी यांना विचारले असता त्यांनी भेटीचे कारण सांगण्याचे टाळले. सुमारे तासभर दोघात बंद खोलीत चर्चा झाली.

या चर्चेत नेमके काय मुद्दे होते, याची उत्सुकता आता ताणली आहे. मात्र, मंत्री शिंदे यांनी ही सदिच्छा भेट होती, असे स्पष्ट केले आहे. बंद खोलीतील चर्चेनंतर मंत्री शिंदे यांच्या शेतात संभाजी भिडे गुरुजी यांच्या हस्ते फणसाचे रोप लावण्यात आले. या वेळी खासदार श्रीकांत शिंदे उपस्थित होते.