कऱ्हाड (जि. सातारा) : रेठरे बुद्रुक येथील यशवंतराव मोहिते कृष्णा सहकारी साखर कारखान्याची वेळोवेळी पुढे ढकलण्यात आलेली पंचवार्षिक निवडणूक तातडीने घेण्यासाठी आवश्‍यक ती कार्यवाही करा, असा आदेश मुंबई उच्च न्यायालयाने दिला आहे. राज्य सहकारी निवडणूक प्राधिकरणासही न्यायालयाने आदेश दिला आहे. काले येथील कारखान्याचे सभासद व याचिकाकर्ते डॉ. अजित देसाई यांनी ही माहिती दिली. 

न्यायालयाच्या निकालाबाबात डॉ. देसाई यांनी सविस्तर माहिती दिली. "कृष्णा' कारखान्याच्या संचालक मंडळाची मुदत सहा महिन्यांपूर्वी संपली आहे. कारखान्याची निवडणूक गेल्या वर्षी होणे अपेक्षित होते. मात्र, कोरोना महामारीमुळे सहकारी संस्थाच्या निवडणुका पुढे ढकलल्या होत्या. यावर्षीच्या सुरुवातीस निवडणूक होणे अपेक्षित होते. मात्र, कार्यकाल संपलेल्या सहकारी संस्थांची संख्या जास्त असल्याने "कृष्णा' कारखान्याची निवडणूक नेमकी कधी होणार याबाबत संभ्रम होता. त्यामुळे त्याबाबत मुंबई उच्च न्यायालयात निवडणुकीची प्रक्रिया तातडीने सुरू करण्याची याचिका दाखल केली होती. 

देशात सलग दोन वर्षे प्रथम क्रमांक पटकावणाऱ्या कऱ्हाड पालिकेला हवेत 160 कर्मचारी

त्यावर न्यायमूर्ती आर. डी. धानुका व व्ही. जी. बिष्ट यांच्या खंडपीठासमोर सुनावणी झाली. डॉ. देसाई यांच्या वतीने ऍड. चेतन पाटील यांनी युक्तिवाद केला. या प्रकरणी राज्य सहकारी निवडणूक प्राधिकरण, राज्य सरकार आणि "कृष्णा' कारखान्यास प्रतिवादी केले होते. त्या काळात राज्य सरकारने दोन फेब्रुवारीला निवडणुका घेण्यासंदर्भात एक आदेश काढला होता. याचिकाकर्ता व सभासद या नात्याने प्रत्यक्ष निवडणूक प्रक्रिया सुरू करण्याची कार्यवाही अजून सुरू झाली नसल्याचे न्यायालयाच्या निदर्शनास आणून दिले. उच्च न्यायालयाने राज्य सहकारी निवडणूक प्राधिकरणास स्पष्ट निर्देश द्यावेत, अशी विनंती केली होती. ती मागणी ग्राह्य मानून बुधवारी (ता. 10) त्यासंबंधी न्यायालयाने निर्णय दिला. 

मायबाप सरकारला तमाशा कलावंताची आर्त साद

उच्च न्यायालयाने "कृष्णा' कारखान्याची निवडणूक प्रक्रिया तातडीने सुरू करा, असा स्पष्ट आदेश दिला आहे. या आदेशाच्या प्रती राज्य सरकार, राज्य सहकारी निवडणूक प्राधिकरण, साखर आयुक्त आणि कारखान्याला दिल्या आहेत. 
-डॉ. अजित देसाई, कारखाना सभासद व याचिकाकर्ते 

संपादन : बाळकृष्ण मधाळे