सातारा : राष्ट्रवादी कॉंग्रेस पक्षाप्रमाणे भविष्यात राष्ट्रीय समाज पक्ष किंगमेकर ठरेल, असा विश्‍वास राष्ट्रीय समाज पक्षाचे अध्यक्ष व माजी पशुसंवर्धन मंत्री महादेव जानकर यांनी व्यक्त केला. केंद्राने केलेल्या कृषी कायद्याचेही त्यांनी समर्थन केले. 

राष्ट्रीय समाज पक्षाच्या पदाधिकाऱ्यांचा येथील नगरपालिका मंगल कार्यालयात आज मेळावा पार पडल. या वेळी आयोजित पत्रकार परिषदेत ते बोलत होते. आमदार जानकर म्हणाले, राष्ट्रीय समाज पक्षाची ताकद देशात वाढण्याचे काम सुरू आहे. महाराष्ट्राबरोबरच बाहेरच्या राज्यातही पक्षाला प्रतिष्ठा मिळत आहे. आगामी काळात राज्याच्या विधानसभेत रासपचे आमदार निवडून आणण्याचे नियोजन केले आहे. सातारा जिल्ह्यात फलटण व माण विधानसभा मतदारसंघावर रासपने लक्ष केंद्रित केलेले आहे. या दोन्ही तालुक्‍यांमध्ये रासपची ताकद मोठी आहे. या दोन्ही मतदारसंघांमध्ये रासपचे आमदार निवडून येतील. त्याचबरोबर राज्यातील अन्य भागातही पक्षाचे आमदार होतील. त्यामुळे ज्या प्रमाणे राष्ट्रवादी पक्ष आता किंगमेकर आहे, तशी भूमिका भविष्यामध्ये रासप पक्ष निश्‍चित बजावेल. 

पश्‍चिम महाराष्ट्रातील रेल्वे प्रकल्पांना मिळणार चालना; आरोग्यमंत्र्यांनंतर उदयनराजेंची रेल्वेमंत्र्यांना भेट, गोयलांकडे केल्या या महत्वपूर्ण मागण्या

केंद्र शासनाने केलेल्या कृषी विधेयकांचे आमदार जानकर यांनी समर्थन केले आहे. ते म्हणाले, केंद्रीय कृषी मंत्री तोमर हे शेतकऱ्यांचे पुत्र आहेत. शेतकऱ्यांची परिस्थिती त्यांना चांगली माहित आहे. कॉंग्रेसचे कृषी कायदे चुकीचे असल्यानेच देशात आणि राज्यात मोठ्या प्रमाणावर शेतकऱ्यांनी आत्महत्या केल्या. या आत्महत्या रोखण्यासाठी व शेतकऱ्यांना आर्थिक स्थैर्य मिळवून देण्यासाठी केंद्र सरकारने कायदे केले आहेत. या विधेयकामुळे शेतकऱ्यांचा लाभच होणार आहे. पशुसंवर्धन मंत्री असताना गायीच्या व म्हशीच्या दुधाला दर वाढवून दिला. आता भाजप व मित्र पक्षांचे सरकार सत्तेवर नाही महाविकास आघाडीचे सत्तेवर आहे, त्यांची नियत चांगली नाही, असा आरोपही त्यांनी केला. 

मल्ल्या गेलाय लंडनला... मल्ल्याच्या चुका ज्या बॅंकेने केल्या, त्या बॅंकेला पैसे द्यायचे का?; सभापतींचा रिझर्व्हवर घाव

संपादन : बाळकृष्ण मधाळे