खंडाळा (जि. सातारा) : शहाराचा दैनंदिन व आठवडा बाजार मुख्य रस्त्यावर न भरवता येथील बाजारतळावरच भरवावा, अन्यथा येत्या गुरुवारी नगरपंचायत कार्यालयास टाळे ठोको आंदोलन करणार असल्याची माहिती शहर व्यापारी असोसिएशनचे अध्यक्ष जितेंद्र गाढवे यांनी दिली. 

याबाबतचे निवेदन आज (सोमवार) तहसीलदार, नगरपंचायत मुख्यधिकारी, सार्वजनिक बांधकाम उपविभाग व खंडाळा पोलिस ठाण्यात देण्यात आले. या वेळी असोसिएशनचे अध्यक्ष गाढवे, सदस्य रवींद्र देशमुख, इम्तियाज मुलाणी, बालाजी मोरे, नितीन साळुंखे, विष्णुपंत भोसले, बाळासाहेब शिराळकर, रघुनाथ ढमाळ, कृष्णराव जमदाडे, गणेश गाढवे, रवी पवार, यशवंत वळवी, तेजस गाढवे, निशिकांत साठे उपस्थित होते.

गळिताची तयारी, पण एफआरपीचे काय?; शेतकरी संघटनांच्या भूमिकेकडे लक्ष
 
येथील शहराच्या मुख्य रस्त्यावर बाजार भरत असल्याने अनेक वेळा वाहनचालक व विक्रेते यांच्यात वादावादी होऊन वाहनकोंडी होत असते. या रस्त्यावर सर्व शासकीय मुख्य कार्यालय असल्याने ये-जा करणाऱ्या नागरिकांना या बाजाराचा त्रास सहन करावा लागतो. गर्दीही मोठी होत असते, म्हणून हा बाजार शहराच्या मध्यवर्ती असणाऱ्या बाजारतळावर दैनंदिन व आठवडा बाजार भरवावा, असे पत्र चार सप्टेंबरला नगरपंचायतीला दिले होते. मात्र, यावर योग्य ती कारवाई न झाल्यामुळे येत्या गुरुवारी नगरपंचायत कार्यालयासमोर ठिय्या आंदोलन व टाळे ठोको आंदोलन करणार असल्याचे निवेदनात म्हटले आहे. 

संपादन : बाळकृष्ण मधाळे