सातारा : नदीपात्रात पुरेसे पाणी असतानाही योग्य प्रमाणात उपसा होत नसल्यामुळे शाहूपुरीसह शाहूनगरच्या काही भागात गेल्या काही दिवसांपासून पाणीपुरवठा विस्कळित झाला आहे. याबाबतच्या तक्रारी करूनही महाराष्ट्र जीवन प्राधिकरणाच्या कार्यपध्दतीत सुधारणा न झाल्याने या भागातील नागरिक आंदोलनाच्या पवित्र्यात आहेत.

शाहूपुरीसह शाहूनगर परिसरात जीवन प्राधिकरणाच्या माध्यमातून पाणीपुरवठा करण्यात येतो. गेल्या काही दिवसांमध्ये या भागातील पाणीपुरवठा विस्कळित झाला आहे. या विस्कळित पाणीपुरवठ्यामुळे नागरिकांना पाण्यासाठी टॅंकर व इतर पर्यायांचा अवलंब करावा लागत आहे. याबाबत प्राधिकरणाकडे चौकशी केली असता, त्यांच्याकडून उडवाउडवीची उत्तरे मिळत असल्याच्या नागरिकांच्या तक्रारी आहेत. याबाबत काही अधिकारी, कर्मचाऱ्यांकडे चौकशी केली असता, त्यांनी नदीपात्रात पुरेसे पाणी असले तरी उपसा करण्याच्या वेळापत्रकाचे स्थानिक पातळीवर पालन होत नसल्याची माहिती नाव न छापण्याच्या अटीवर सांगितली.

नदीपात्रात पाणी असूनही शाहूपुरीच्या मोळाचा ओढा, आंबेदरे रोड, आझादनगरसह सुमारे 50 कॉलन्यांना तसेच गोडोली चौकापासून अजिंक्‍य बझार चौकापर्यंतच्या शाहूनगरमधील नागरिकांना गेले काही दिवस टंचाईचा सामना करावा लागत आहे. याबाबतच्या तक्रारी वाढू लागल्याने नागरिकांच्या रोषास सामोरे जाण्यापेक्षा रजेवर जाणे चांगले, असा विचार करत प्राधिकरणातील काही अधिकारी रजेवर गेल्याची चर्चाही प्राधिकरण कार्यालयात सुरू आहे. उन्हाळ्याच्या तोंडावर शाहूपुरी, शाहूनगरमधील नागरिकांना कृत्रिम पाणीटंचाईचा सामना करावा लागत असल्याने तीव्र असंतोष असून, याविरोधात येत्या काही दिवसांत शाहूपुरीतील नागरिक प्राधिकरण कार्यालयासमोर आंदोलन करण्याच्या तयारीत आहेत.

दरे खुर्दमध्ये ये रे माझ्या मागल्या...

हद्दवाढीनंतर दरे खुर्द हा भाग पालिकेत आला आहे. याठिकाणी आठवड्यातून एक दिवस पाणीपुरवठा होत होता. याबाबतच्या तक्रारी झाल्यानंतर उपाध्यक्ष मनोज शेंडे, पाणीपुरवठा सभापती सीता हादगे यांनी पुढाकार घेत त्याठिकाणी आठवड्यातून दोन दिवस पाणीपुरवठा सुरू केला. यासाठी स्वतंत्र कर्मचारीही नेमण्यात आले. मात्र, अलीकडच्या काळात या भागाला पुन्हा आठवड्यातून एक दिवस पाणीपुरवठा सुरू झाला आहे.