आपली पृथ्वी अंतराळातून कशी दिसते, हा विचार प्रत्येकाच्या मनात आलेला असतो. आतापर्यंत चंद्रावरुन, किंवा स्पेसमधून पृथ्वीचे कित्येक फोटो काढण्यात आले आहेत. तुम्ही इंटरनेटवर हे फोटो पाहिले असतील. मात्र, आता इंटरनॅशनल स्पेस स्टेशनने पृथ्वीचा एक वेगळा व्हिडिओ शूट केला आहे.

अंतराळातील प्रयोगशाळा म्हणून ओळखल्या जाणाऱ्या आंतरराष्ट्रीय स्पेस स्टेशनने, आपली पृथ्वी रात्रीच्या वेळी कशी दिसते हे दाखवलं आहे. रेडिट स्पेस व्ह्यू या एक्स (ट्विटर) हँडलवरुन हा व्हिडिओ पोस्ट करण्यात आला आहे. अर्थात, हे ISS चं अधिकृत हँडल नाही.

या व्हिडिओला तब्बल पाच लाखांहून अधिक व्ह्यूज आणि 9 हजारांहून अधिक लाईक्स मिळाले आहेत. या व्हिडिओमध्ये प्रकाशाने उजळून निघालेली कित्येक शहरं दिसत आहेत. तसंच कित्येक ठिकाणी ढगांमध्ये विजा चमकतानाही दिसत आहेत.

इंटरनॅशनल स्पेस स्टेशन हे पृथ्वीच्या पृष्ठभागापासून 400 किलोमीटर उंचीवर प्रस्थापित करण्यात आलेलं आहे. या कक्षेमध्ये ते सातत्याने पृथ्वीभोवती फिरत असतं. या उंचीवरुन पृथ्वीचा सुंदर व्ह्यू दिसतो. केवळ शहरांमधील लाईट्स नाहीत, तर पृथ्वीभोवती नॉर्दन लाईट्समुळे होणारी बॉर्डरलाईनही याठिकाणाहून दिसते.