गरम तव्यावर बसून आपल्या भक्तांना आशिर्वाद देणाऱ्या एका बाबाचा व्हिडीओ गेल्या काही दिवसांपासून व्हायरल होतोय. तुमच्यापर्यंतही हा व्हिडीओ पोहोचला असेलच. या व्हिडीओतल्या बाबाने आता आपली भूमिका मांडली आहे. आपण साधूसंत नसल्याचा दावाही त्याने केला आहे.

कोण आहे हा चुलीवरचा बाबा?

हा बाबा अमरावती जिल्ह्यातल्या तिवसा तालुक्यातल्या मार्डी इथला आहे. या बाबाचं नाव संत गुरुदास महाराज असं आहे. या व्हिडीओमध्ये हा कथित बाबा तव्यावर बसून भक्तांना आशिर्वाद देताना दिसत आहे. गुरुदास महाराज गौरक्षणाचं काम करतो, तिथे त्याचा आश्रमही आहे.

हा व्हिडीओ पाहिल्यानंतर अंधश्रद्धा निर्मूलन समितीने या बाबाला आव्हान दिलं आहे. हा चमत्कार जर खरा असेल, तर त्यांनी तो सिद्ध करून दाखवावा. आम्ही त्या महाराजांना ३० लाख रुपयांचं बक्षीस देऊ, असं अंधश्रद्धा निर्मूलन समितीचे सचिव हरीश केदार म्हणाले.

त्यानंतर या बाबाने आपली प्रतिक्रिया दिली आहे. मी कुठलंही अंधश्रद्धेचं काम करत नाही. मला दैवी शक्ती प्राप्त होते. त्यावेळी मला कुठलंही भान नव्हतं. मी अंधश्रद्धा पसरवत नाी, हा श्रद्धेचा भाग आहे, मी साधू संत नाही, असा दावा या गुरुदास महाराजने केला आहे.