मुंबई : जमीन मोजणीसाठी पैसे भरल्यानंतरही काम करण्यास टाळाटाळ करणाऱ्या भूमी अभिलेख विभागाच्या कर्मचाऱ्याला शेतकऱ्याच्या पोरानं इंग्रजीतून झाडल्याचा एक व्हिडिओ सध्या सोशल मीडियात व्हायरल झाला आहे. शेतकऱ्यांना पदोपदी नाडणाऱ्या अशा निर्धावलेल्या सरकारी बाबूंचा कारभार त्यामुळं चव्हाट्यावर आला आहे. हा व्हायरल व्हिडिओ असून याची अद्याप पुष्टी झालेली नाही. (farmer son fired employee of land records from English video viral)

काय घडलंय नक्की?

हिंगोली जिल्ह्यातील हा व्हिडिओ असून यामध्ये शेतकऱ्याचा एक उच्चशिक्षित मुलगा आपल्या गावच्या जमीनीसंदर्भातील कामासाठी भूमी अभिलेखच्या कार्यालयातील कर्मचाऱ्याला इंग्रजीतून झापताना दिसतोय. आपल्या वडिलांनी जमिनीच्या मोजणीसाठी पैसे भरुनही त्यांना अद्याप मोजणीची नोटीस मिळाली नव्हती. पैसे भरुनही ही नोटीस पाहू दिली जात नव्हती. त्यामुळं संतापलेल्या या शेतकऱ्याच्या मुलानं संबंधित कर्मचाऱ्याचा इंग्रजी भाषेत चांगलाच समाचार घेतला.

व्हायरल व्हिडिओत काय आहे?

लाचखोर कर्मचाऱ्याला उघडं पाडण्यासाठी त्यानं मोबाईलमध्ये याचं चित्रीकरणंही केलं. संतापलेल्या या शेतकरी पुत्रानं कर्मचाऱ्याला इंग्रजीत झापायला सुरुवात केल्यानंतर त्याची भंबेरी उडाली होती.

शेतकरी पुत्र : "मला अद्याप माझी नोटीस मिळालेली नाही, मला ती तातडीनं हवी आहे. तुमचं ओळखपत्र कुठे आहे? मला बाकी काही नको"

कर्मचारी : यासाठी तुम्हाला साहेबांना भेटावं लागेल.

शेतकरी पुत्र : हवं तर माझ्याविरोधात तुम्ही खटला दाखल करा, मी तुमच्याशी इथं तुमच्याशी हुज्जत घालायला आलेलो नाही.

कर्मचारी : तुम्हाला नोटीस पाठवली आहे.

शेतकरी पुत्र : मला आत्ताच्या आता नोटीस हवी आहे, ती तुम्ही कशी पाठवली आहे, त्याची प्रक्रिया मला मला सांगा. तुम्ही नोटीस पाठवायला उशीर का केला? तुम्ही मला तातडीनं याबाबत का कळवलं नाही? माझे वडील इथं दिसताहेत का? तुम्ही चुकीची गोष्ट केली आहे. याच्यासाठी जबाबदार व्यक्ती कोण आहे? मला आत्ताच्या आत्ता नोटीस हवी आहे, पोलिसांनाही बोलवा.

कर्मचारी : तुम्हाला नोटीस पाठवण्यात आली आहे.

शेतकरी पुत्र : नाही, मला तुमच्या विभागाकडून अद्याप कुठलीही नोटीस आलेली नाही.

कर्मचारी : पोस्टानं तुम्हाला नोटीस पाठवण्यात आली आहे.

शेतकरी पुत्र : पोस्टानं नोटीस पाठवल्याचं रेकॉर्ड मला आत्ताच्या आत्ता पाहिजे. तुम्ही चुकीचं काम केलं आहे. तुमच्या विभागानं अद्याप नोटीस का पाठवली नाही, याचं उत्तर मला हवं आहे.