काल फादर्स डे च्या निमित्ताने अनेकांनी आपल्या वडिलांचे फोटो सोशल मीडियावर पोस्ट केले असतील किंवा एक लांबलचक पोस्ट लिहिली असेल. पण ९० च्या दशकाच्या काळातील ग्रामीण भागातील तरूणांचं बालपण काही वेगळंच होतं. खोड्या करणे, उनाडक्या करणे, रानावनात हिंडणे आणि त्यामुळे आईवडिलांचा मार खाणे या गोष्टी सर्वांनी अनुभवल्या असतील.

सध्या फादर्स डे च्या निमित्ताने एक व्हिडिओ व्हायरल झाला आहे. हा व्हिडिओ तसा जुना आहे. एक मुलगा काही मुलांमध्ये पारावर बसलेला असताना त्याचा बाप येतो आणि त्याला चप्पलेने जबर मारहाण करतो. "इथे का आलास? तुला सांगितलेलं काम केलंस का?" असं काहीतरी तो बोलत आहे. तर चप्पलेने सात आठ फटके मारल्यानंतर मुलाला चांगलीच अद्दल घडली आहे.

दरम्यान, या प्रकारच्या बापाचा दरारा किती असतो हे या व्हिडिओमध्ये पाहायला मिळेल. लेकाला मारत असताना एकही मुलगा भांडणे सोडवायला धजावत नाही. पण या बापाची मुलाला मारण्यामागे एक वेगळीच काळजी असायची. मुलाला वाईट वळण लागू नये, त्याने चांगलं शिकून मोठं व्हावं अशी प्रत्येक बापाची इच्छा असते. त्यामुळे मुलांना मारण्यामागचा त्यांचा उद्देशही तसाच असतो.

सध्या हा व्हिडिओ सोशल मीडियावर चांगलाच व्हायरल झाला असून अनेकांनी त्यावर आपल्या प्रतिक्रिया व्यक्त केल्या आहेत. "असा बाप होणे नाही, 'फादर्स डे'चं मुलाला मिळालेलं रिटर्न गिफ्ट" अशा विनोदी प्रतिक्रिया नेटकऱ्यांनी केल्या आहेत. आपल्यापैकीही अनेकांनी असा अनुभव घेतला असून वडिलांचा मार खाल्ला असेल. फादर्स डे च्या निमित्ताने अनेकांनी हा व्हिडिओ पोस्ट केला आहे.