हैदराबाद : पाकिस्तानमधील एका व्यक्तीने आपल्या मृत मुलीवर बलात्कार होऊ नये यासाठी तिच्या कबरीला कुलूप लावल्याची खोटी बातमी प्रसारमाध्यमांवर प्रसिद्ध झाली होती. त्यानंतर ही कबर भारतातीलच असल्याची धक्कादायक माहिती समोर आली आहे. हैदराबाद येथील मस्जिद ई सालार मुल्क, दरब जंग कॉलनी, मदनापेट येथील हा फोटो असल्याची माहिती आहे.

या कबरीचा फोटो सोशल मीडियावर मोठ्या प्रमाणात व्हायरल झाल्यानंतर अनेक स्तरातून पाकिस्तानवर निशाणा साधला गेला होता. ही माणुसकीला काळीमा फासणारी आणि महिलांचा अपमान करणारी घटना असल्याचं म्हटलं गेलं होतं. पण नंतर हा फोटो तेलंगणा येथील हैदराबादमधील असून कबरीला कुलूप लावण्यामागे दुसरं कारण असल्याची माहिती उघड झाली.

दरम्यान, यासंदर्भात मशिदीचे मुअज्जीन मुक्तार साहब यांच्याशी संवाद साधला असता ते म्हणाले की, "ही कबर अंदाजे 1.5 ते 2 वर्षे जुनी आहे, जी प्रवेशद्वाराच्या अगदी समोरच आहे त्यामुळे पुढे जाणाऱ्या रस्त्यावर अडथळा येतो. तर अनेकजण मृतदेह आणून या जुन्या कबरीमध्ये दफन करतात. त्यामुळे जुन्या मृतांच्या नातेवाईकांना त्रास होतो. हा त्रास होऊ नये यासाठी या कबरीला लोखंडाचे गेट लावले आहे." अशी माहिती मुक्तार यांनी दिली आहे.