मोरोक्को : मोरोक्को या देशात आज भारतीय वेळेनुसार पहाटे पावणेचारच्या सुमारास मोठा भूकंप झाला. तर या दुर्घटनेमध्ये आत्तापर्यंत ६०० पेक्षा जास्त नागरिकांचा मृत्यू झाला असून या घटनेचे सीसीटीव्ही फुटेज सोशल मीडियावर व्हायरल झाले आहेत. थरकाप उडवणारे फोटो आणि व्हिडिओ पाहून आपलंही काळीज पिळवटून निघेल.

शनिवारी पहाटेच्या सुमारास ६.८ रिश्टर स्केल तिव्रतेचे भूकंपाचे धक्के बसल्यामुले मोरोक्को येथील अनेक इमारती जमीनदोस्त झाल्या. नागरिकांचे संसार उध्वस्त झाले असीन अनेक नागरिक अंगावरील कपड्यानिशी रस्त्यावर आले आहेत. हे थरकाप उडवणारे व्हिडिओ आणि हॉस्पिटलमध्ये झालेली गर्दी पाहून मन सुन्न होईल.

समोर आलेल्या व्हिडिओमध्ये एका इमारतीखाली काही नागरिक बसलेले असताना त्यांना अचानक भूकंपाचे धक्के जाणवू लागतात. त्यानंतर नागरिक सैरावैरा धावू लागतात. त्यांना कुठे जावं तेही कळत नाही. तेवढ्यात इमारतीचा एक भाग खाली कोसळतो आणि त्यामध्ये एक नागरिक जखमी झाल्याचं दिसत आहे. दुसऱ्या एका व्हिडिओमध्ये मोठी इमारत क्षणात जमीनदोस्त झाल्याचं पाहायला मिळत आहे.

मोरोक्कोला शक्य ती मदत देण्यासाठी भारत तत्पर - पंतप्रधान मोदी

"या दुःखद क्षणांमध्ये मी मोरोक्कोच्या लोकांसोबत आहेत. ज्या नागरिकांनी आपल्या प्रियजनांना गमावले आहे त्यांच्याबद्दल शोक व्यक्त करतो. जखमी लवकरात लवकर बरे व्हावेत. या कठीण काळात मोरोक्कोला शक्य ती सर्व मदत देण्यासाठी भारत तत्पर आहे" असं मत भारताचे प्रंतप्रधान नरेंद्र मोदी यांनी व्यक्त केलं.