नवी दिल्ली : जर तुम्हाला क्रिप्टोकरन्सी मार्केटमध्ये गुंतवणूक करण्याची इच्छा असेल तर तुम्हाला डिजिटल मालमत्ता आणि क्रिप्टोकरन्सीवरील (Crypto Curreny) हा मोठा बदल माहित असणे आवश्यक आहे. अर्थमंत्री निर्मला सीतारामन (Union Budget 2022) यांनी मंगळवारी केंद्रीय अर्थसंकल्प जाहीर केला. यामध्ये सरकारने क्रिप्टो करन्सी कराच्या कक्षेत आणण्याची घोषणा सीतारामन यांनी केली आहे.

क्रिप्टो करन्सीमधून मिळणाऱ्या उत्पन्नावर ३० टक्के कर आकारला जाईल. या ३० टक्के कराव्यतिरिक्त, अर्थमंत्र्यांनी डिजिटल मालमत्तेच्या हस्तांतरणावरही ३० टक्के कर आकारला जाईल, अशी घोषणा केली. एका मर्यादेपेक्षा जास्त डिजिटल मालमत्तेचे हस्तांतरण केल्यास एक टक्का टीडीएस मिळेल, असे अर्थमंत्र्यांनी सांगितले. त्याचबरोबर भेटवस्तू म्हणून मिळालेल्या डिजिटल मालमत्तेवरही कर आकारला जाईल, असंही अर्थमंत्र्यांनी सांगितलं आहे.

क्रिप्टोकरन्सी बिल नाही -

डिसेंबर 2021 मध्ये संसदेच्या हिवाळी अधिवेशनापूर्वी, सरकार क्रिप्टो करन्सी आणि अधिकृत डिजिटल चलन नियमन विधेयक २०२१ असं विधेयक आणतील, अशी चर्चा होती. मात्र, त्याबाबत अनेक बाबींवर अजूनही चर्चा सुरू आहे, असं सरकारने स्पष्ट केलं होतं. आता सरकारने थेट क्रिप्टो कराच्या कक्षेत आणले आहे. त्यामुळे आता क्रिप्टो गुंतवणुकीवर काय परिणाम होतो? हे पाहणे महत्वाचे असणार आहे.