न्याहळोद (जि. धुळे) : परिसरात पावसाची (Rain) संततधार सुरु असून एकीकडे शेतकरी पेरणीची लगबग तर दुसरीकडे शेतमजुरांच्या घराची पडझडीमुळे शेतमजूर बेघर झाले आहेत. गेल्या तीन ते चार दिवसापासून मध्यम ते जोरदार होत असलेल्या पावसामुळे मातीच्या घराची पडझड (Collapsed) होत असून, येथील शेतमजूर विजय सोमा कोळी यांच्या घराची भिंत कोसळून गॅस भांडी भिंतीखाली दाबल्यामुळे कोळी परिवार उघड्यावर आला आहे. रात्र कशी निघेल या विवंचनेत कोळी परिवार चिंतामग्न आहे. (house collapsed due to continuous rains Dhule News)

एकीकडे शासन सांगते की प्रत्येकाला पक्के घर बांधून मिळेल परंतु येथे वेगळीच परिस्थिती पाहायला मिळत आहे. ज्या लाभार्थ्याला खरी गरज आहे त्यांना मात्र बेघर, ज्यांना आवश्यक नाही अशांना घराचा लाभ मिळाला आहे. काहींना घरे आहेत, परंतु राहायची सोय नाही काहींना तर घरच नाहीत अशी परिस्थिती परिसरात दिसून येत आहे. ग्रामपंचायतीला वेळोवेळी पाठपुरावा करूनही घरकुल योजनेत सामावून घेण्याची मागणी केली. लाभार्थी असूनही पक्के घर मिळत नसल्याची तक्रार विजय कोळी यांनी केली आहे.