नंदुरबार : नंदुरबार शहरात दांपत्यामध्ये वाद होऊन दोन दिवसांपूर्वी पतीने चाकूने गळा चिरून पत्नीचा खून केला होता. त्यानंतर फरारी झालेल्या पतीस स्थानिक गुन्हे शाखेच्या पथकाने २४ तासांत शोधून काढत त्याला बेड्या ठोकल्या आहेत. पोलिसी खाक्या दाखविताच त्याने मोबाईल हाताळण्यावरून वाद झाल्याने संतापात खून केल्याची कबुली दिली.

अरुण सुकलाल नामदास (वय ३६) व रेखा अरुण नामदास (२८) हे दांपत्य शहरातील तुलसीविहार कॉलनी (प्लॉट क्रमांक २२) येथे राहते. २१ जून रात्री ते २२ जूनच्या सकाळी साडेदहादरम्यान पती-पत्नीत वाद झाल्यानंतर रागाच्या भरात अरुण नामदास याने पत्नी रेखाचा चाकूने गळा चिरून तेथून पळून गेला. रेखाला शेजारच्या व्यक्तींनी रुग्णालयात दाखल केले. डॉक्टरांनी तपासणीनंतर त्यांना मृत घोषित केले होते. अरुण नामदास यांच्याविरुद्ध उपनगर पोलिस ठाण्यात खुनाचा गुन्हा नोंदविण्यात आला होता.

पोलिस अधीक्षक पी. आर. पाटील, अपर पोलिस अधीक्षक विजय पवार, उपविभागीय पोलिस अधिकारी सचिन हिरे, स्थानिक गुन्हे शाखेचे निरीक्षक रवींद्र कळमकर, सहाय्यक निरीक्षक संदीप पाटील व पथक तत्काळ घटनास्थळी दाखल झाले. निरीक्षक कळमकर व उपनगर पोलिस ठाण्याचे भदाणे यांच्या नेतृत्वाखाली वेगवेगळी पथके तयार करून संशयित आरोपीचा शोध घेण्यास प्रारंभ झाला. अरुण नामदास हा सिंधी कॉलनीतील तमन्ना सुपर शॉपी नावाच्या दुकानात काम करीत असल्याची माहिती मिळाली. तेथे त्याच्याबाबत अधिक माहिती त्याचा फोटो व मोबाईल क्रमांक प्राप्त केला. तसेच थोड्या वेळापूर्वी तो दुकानावर येऊन मालकाकडून ५०० रुपये घेऊन गेल्याचे समजले. संशयित मूळगावी अमळनेर (जि. जळगाव) येथे धुळेमार्गे बसने जात असल्याचे समजले.

स्थानिक गुन्हे शाखेच्या पथकाने नंदुरबार बसस्थानकावर जाऊन धुळ्याला जाणाऱ्या बस व खासगी वाहनांची माहिती घेतली असता थोड्याच वेळापूर्वी धुळ्याला बस गेल्याची माहिती मिळाली. पथक धुळ्याकडे रवाना केले. धुळे येथील बसस्थानकावर पोचल्यावर पथकाने परिसरात शोध घेत असताना तो टॅक्सी स्टँडजवळ अमळनेर येथे जाणाऱ्या गाडीजवळ उभा असल्याचे दिसले. त्यास चाहूल लागताच तेथून पळ काढला; परंतु पथकाने अरुणला शिताफीने ताब्यात घेतले. त्यास नंदुरबार येथे आणले. निरीक्षक कळमकर यांनी बोलते केले असता त्याने खून केल्याचे कबुली दिली. तसेच अरुणने घटनेची माहिती सांगितली. त्यात पत्नी रेखाचा मोबाईल हातात घेण्यावरून वाद झाला. त्या रागात रेखा नामदास हिचा धारदार चाकूने गळा चिरून ठार केल्याचे त्याने सांगितले.