चाळीसगाव ः सध्या जगभरातील तरुणाईला वेड लावणाऱ्या ‘टिकटॉक’चा वापर करणारे भारतात नऊ कोटी लोक आहेत. सामान्य माणसाला देखील त्याच्या कलागुणांना व्यासपीठ मिळवून देण्यात ‘टिकटॉक’ हे अॅप कमालीचे लोकप्रिय झाले आहे. यामुळे अनेक जण स्‍टार झाले आहेत. असाच चाळीसगावातील एका कामगाराचा मुलगा ‘टिकटॉक’च्या मदतीने लाखो चाहत्‍यांसाठी ‘स्‍टार’ बनला आहे. 

शहरातील हिरापूर रोडवरील रहिवासी रोहित सोनवणे याचे मातृछत्र लहानपणीच हरपले. बहिणीचे लग्न झाल्याने घरी रोहित व त्‍याचे वडील शिवाजी सोनवणे हेच असतात. घरातील सर्व कामे करून रोहित हा शहरातील चव्‍हाण महाविद्यालयात प्रथम वर्ष कला शाखेत शिकत आहे. शिक्षण घेत असताना रात्री तो शहरातील एका दवाखान्यातही काम करतो. लहानपणापासून कलेची आवड असल्‍याने रोहित शाळेत होणाऱ्या वेगवेगळ्या नाट्य स्पर्धेत सहभाग घ्यायचा. मात्र, कौंटुंबिक परिस्‍थिती हालाकीची असल्‍याने त्याच्याजवळ बाहेरगावी स्‍पर्धेसाठी जाण्यासाठी पैसे नसायचे. त्यामुळे अनेक मोठ्या नाट्य स्पर्धांना तो मुकला देखील आहे. मात्र, आपल्‍या अंगी असलेल्या कलागुणांना वाव देणाऱ्या ‘टिकटॉक ऍपची माहिती त्याला मित्रांकडून मिळाली. मित्रांनीच त्याला मोबाईल घेऊन दिल्यानंतर त्‍यावर त्याचे व्हिडिओ तयार करायला सांगितले. त्याचे व्हिडिओ मित्रांमध्येच कमालीचे लोकप्रिय झाले.

त्यानंतर त्याने तयार केलेले व्हिडिओ ‘टिकटॉक’वर अपलोड केल्यानंतर काही दिवसांतच त्याला त्याच्या चाहत्‍यांनी अक्षरशः डोक्‍यावर घेतले. रोहितच्या व्हिडिओला सध्या २७ लाखांपर्यंतच्या ‘लाईक’ मिळाल्या आहेत. त्याचे एक लाख ४२ हजार फालोअर्स आहेत. त्‍याने आतापर्यंत पाचशेहून अधिक व्हिडिओ तयार करून ‘टिकटॉक’वर ‘अपलोड’ केले आहेत. त्‍याच्यातील कलागुणांमुळे त्याचा चाहता वर्ग वाढला आहे. अगदी तो रस्त्यावरून जरी फिरत असेल आणि त्याला त्याच्या एखाद्या चाहत्याने पाहिले तर लगेचच त्याच्यासोबत फोटो काढण्यासाठी ते येतात.

रोहित एवढ्यावरच थांबलेला नाही तर त्याने आता खानदेशी गाण्यावर एक व्हिडिओ तयार केला असून तो ‘युट्यूब’वर आता काम करतो आहे. एका तरुणीला लग्नानिमित्त हळद लावतानाचा एक व्हिडिओ डोळ्यांत पाणी आणणारा असून त्याच्या या व्हिडिओला तब्‍बल ८० लाख दर्शक असून आतापर्यंत ६० हजार लोकांनी तो ‘शेअर’ केला आहे. रोहितच्या या अदाकारीचे सर्वत्र कौतुक होत आहे. 

मला लहानपणापासूनच कलेची आवड आहे. घरच्या आर्थिक परिस्‍थितीमुळे बाहेरगावी जाऊन यासाठीचे शिक्षण घेणे मला शक्य नाही. सध्या ‘टिकटॉक’वरच व्हिडिओ टाकून माझे कलागुण लोकांसमोर मांडत असतो. चित्रपटात काम करण्याचे माझे स्‍वप्‍न आहे. त्‍यासाठी मी प्रयत्‍नशील आहे. 
रोहित सोनवणे, टिकटॉक स्‍टार, चाळीसगाव