चांदोरी, "सर सलामत तो पगडी पचास', असे म्हणतात. यातला गमतीचा भाग सोडला, तर आजच्या जमान्यात किती जणांना फेटे बांधता येतात, हा प्रश्‍नच आहे. मात्र निफाड तालुक्‍यातील भेंडाळी गावातील सुदाम खालकर जवळपास 30 हून अधिक पद्धतीचे फेटे बांधतात. आतापर्यंत खासदार छत्रपती संभाजी महाराज भोसले, उदयनराजे भोसले, दिवंगत भय्यू महाराज यांना फेटा बांधण्याचे भाग्य लाभले, तर रायगडावर 2009 पासून शिवराज्याभिषेक दिनानिमित्त नाशिक जिल्ह्यातून येणाऱ्या शिवभक्तांना स्वखर्चाने फेटे बांधतात. 

जशी प्रत्येक मैलावर भाषा बदलते, तसा वेशभूषेतही बदल होत असतो. प्रत्येकाची फेटे बांधण्याची पद्धतही वेगळी! कोल्हापुरी फेटा, सोलापुरी फेटा, ब्राह्मणी फेटा, धनगरी फेटा, शेतकरी फेटा, राजस्थानी फेटा यांसह फेटे बांधण्याचे अनेक प्रकार आहेत. अशा तीस प्रकारांत सुदाम खालकर सहज फेटा बांधतात. शिवाय डोळ्याला पट्टी बांधूनही फेटा बांधण्याचे कौशल्य त्यांच्याकडे आहे.

तुकाराम खेडकर यांच्या तमाशातील तत्कालीन व्यवस्थापक तात्या बेल्हेकर यांच्या मुलाच्या लग्नात श्री. खालकर यांच्याकडे घोडा असल्याने ते नवरदेव मिरवण्यासाठी गेले. श्री. बेल्हेकर यांची फेटा बांधणी बघून ते प्रभावित झाले. त्यानंतर जीवनातील पहिली ऑर्डर लासलगाव येथील रॉयल पॅलेसमध्ये 300 रुपयांची केली. मात्र ते पैसेदेखील खूप वाटले. परिस्थिती प्रतिकूल असल्याने कोठुरे, गुळवंच, निफाड येथे पायी जाऊन फेटे बांधले. फेट्यांच्या व्यवसायातून 2006 मध्ये पहिल्यांदा सायकल घेतली. त्यानंतर घर बांधले आणि द्राक्षबागही लावल्याचे खालकर अभिमानाने सांगतात