नाशिक : शहर व परिसरातील विविध भागांतून दीड वर्षात सुमारे ५४ मुले बेपत्ता झाली आहेत. त्यात अल्पवयीन मुलींचे प्रमाण सर्वाधिक असून, बहुतांश अल्पवयीन मुली प्रेमप्रकरणाच्या आमिषाला बळी पडून बेपत्ता झाल्याचे पोलिस तपासात पुढे आले आहे. यामुळे पोलिस प्रशासन प्रत्येक पालकाला पाल्यांचे मोबाईल तपासा, असा संदेश देत आहे. (54-children-missing-in-Nashik-marathi-news)

अल्पवयीन मुलींना फूस लावण्याच्या प्रकारात वाढ

नाशिक पोलिस आयुक्तालयाच्या हद्दीत शहरातून अल्पवयीन मुले-मुली पळून जाण्याचे किंवा नेण्याचे प्रमाण वाढत आहे. गेल्या वर्षी ३७, तर यंदा १७ अशा दीड वर्षात ५४ घटना उघडकीस आल्या आहेत. अल्पवयीन पळून गेलेल्या मुलांना शोधून त्यांच्या पालकांच्या ताब्‍यात देण्यात पोलिसांना यश आले आहे. मात्र ही आकडेवारी वाढण्यामागे सर्वांच्या हातातील मोबाईल हे प्रमुख कारण असल्याचे पुढे येत आहे. पोलिसांनी दीड वर्षात घडलेल्या घटनांचा मागोवा घेतला असता, यात बेपत्ता होणाऱ्यांत अल्पवयीन मुलींचे प्रमाण अधिक आहे. त्यातही बहुतांश मुलींना फूस लावून पळून नेण्यात आल्याचे समोर आले आहे.

लॉकडाउन अन् मोबाईल

कोरोना महामारीत लॉकडाउन संकल्पना सुरू झाली. या काळात शाळा-महाविद्यालये बंद झाल्याने ऑनलाइन अभ्यास सुरू झाला. ऑनलाइन अभ्यासासाठी पालकांनी मुलांना मोबाईल घेऊन दिले. साहजिकच मोबाईल हाताशी आल्याने अभ्यासानंतरच्या फावल्या वेळात अल्पवयीन मुली प्रेमप्रकरणाच्या नावाखाली बळी पडू लागल्याचे वास्तव दीड वर्षात पोलिस तपासात पुढे आले आहे.

नाशिकमधील चित्र

३७ - सन २०२०

१७ - सन २०२१ (३१ मेअखेर)

- लॉकडाउनमध्ये ऑनलाइन अभ्यास

- ऑनलाइन अभ्यासासाठी मोबाईल

- बेपत्ता होणाऱ्यांत अल्पवयीन मुली अधिक

- फूस लावण्याच्‍या घटनांत मुलीच लक्ष्य

कुमारवयीन मुलींचे प्रमाण सर्वाधिक आहे. बहुतांश मुली प्रेमाच्या आमिषाला बळी पडून किंवा फूस लावून पळून गेल्याचे पुढे येत आहे. त्यामुळे मुलांच्या हातात मोबाईल देणाऱ्या पालकांनी अल्पवयीन मूल कळत नकळत चुकीच्या गोष्‍टीच्या आहारी चालले आहे का? यावर लक्ष ठेवण्याची गरज आहे. - संजय बारकुंड, पोलिस उपायुक्त, गुन्हे शोध विभाग