जुने नाशिक : अमरधाम रोड कुंभारवाडा भागात घरफोडी (Burglary) झाल्याची घटना बुधवारी (ता. ८) घडली. याप्रकरणी भद्रकाली पोलिस ठाण्यात अज्ञात संशयितांविरुद्ध गुन्हा दाखल करण्यात आला. (Burglary in Kumbharwada area Nashik Crime News)

तक्रारदार आशा राऊत या बुधवारी सकाळी नेहमीप्रमाणे मॉर्निंग वॉकसाठी गेल्या. खालच्या रूममध्ये पती झोपलेले होते. त्या घरी परतल्यानंतर त्यांनी त्यांच्या मुलीस घराच्या वरच्या मजल्यावर कपाटामध्ये ठेवलेले सोन्याचे दागिने आणण्यास सांगितले. त्यांची मुलगी वरच्या रूममध्ये गेली असता, सामान अस्ताव्यस्त पडलेले दिसले. दागिने ठेवलेले बॉक्स रिकामे होते. त्यांनी खाली येऊन सर्व प्रकार सांगितला. प्लॅस्टिक पिशवीत ठेवलेले चाळीस हजारांची रोख रक्कम त्यांना आढळून आली नाही. वरील मजल्यावरील रुमचे दार उघडे असल्याची संधी साधत अज्ञात संशयितांनी चोरी केली असल्याची खात्री होताच, त्यांनी पोलिसांना माहिती दिली. ४० हजार रोख रक्कम, ५० हजार रुपये किमतीचे सोन्याची साखळी, अंगठी, कानातले अशा विविध सोन्याचे दागिने, तसेच वीस हजार रुपये किमतीचे चांदीचे दागिने असा एकूण १ लाख १० हजारांचा ऐवज चोरी गेल्याचे तक्रारीत नमूद करण्यात आले आहे.