सिडको : येथील महिंद्रा हाऊस समोर उड्डाण पुलावर रविवारी (ता.११) रात्री सव्वा नऊच्या सुमारास मुंबईहून जळगावकडे जाणाऱ्या कंटेनरच्या कॅबिनला अचानक आग लागली. यात कॅबिन पूर्णपणे जळून खाक झाले असून सुदैवाने कोणतीही जीवितहानी झाली नाही. (Burning Container no casualities Nashik Latest Marathi News)

हेही वाचा : सीमावादात रक्त सांडायला मराठी माणूसच का?

मुंबईहून जळगावच्या दिशेने जात असताना मुंबई आग्रा महामार्गावरील महिंद्रा हाऊस बस थांब्यानजीक कंटेनर (एमएच ४६ एएफ ७८५७) अचानक पेटला. वाहन चालक अनुसिंग पटेल याने तत्काळ कंटेनर रस्त्याच्या कडेला घेत गाडीतून उडी मारली. यावेळी सामाजिक कार्यकर्ते पिंटू काळे यांनी घटनास्थळावर धाव घेत लागलीच अग्निशमन विभागाच्या सिडको कार्यालयास फोन केला. काही वेळात गाडीला लागलेल्या आगीवर नियंत्रण मिळवता आले असले तरी मात्र तो पर्यंत कॅबिन पूर्ण जळून खाक झाले होते.

घटनास्थळी बघ्यांची मोठी गर्दी झाली होती. प्रसंगी अंबड पोलिसांनी वाहतूक सुरळीत केली असून यावेळी प्रशांत जाधव, समाधान ठोके, संदीप पवार, दीपक सोनावणे, प्रदीप चव्हाण यांनी वाहतूक सुरळीत करण्यासाठी पोलिस प्रशासनास मदत केली. तर अग्निशमन विभागाचे संजय गाडेकर, अविनाश सोनवणे, सोमनाथ शिंदे आदींनी आगीवर नियंत्रण मिळवण्यासाठी प्रयत्न केले.