नाशिक : नाशिक महापालिका क्षेत्रातील कनिष्ठ महाविद्यालयांत अकरावी प्रवेशासाठी (11th admission) राबविल्या जाणाऱ्या केंद्रिभूत प्रवेशप्रक्रियेला गती आली आहे. मंगळवारी (ता. १७) दुपारी चारपर्यंत सुमारे चौदा हजार ७०० विद्यार्थ्यांनी ऑनलाइन अर्ज दाखल केले. दरम्‍यान, सकाळी संकेतस्‍थळात तांत्रिक बिघाड आल्‍याने नव्‍याने अर्ज भरताना अडचणी निर्माण होत होत्‍या. शाखा, महाविद्यालयांचा पसंतीक्रम नोंदविण्याकरिता महत्त्वाचा असलेल्‍या अर्जाचा भाग दोन भरण्यासदेखील सुरवात झालेली आहे. विद्यार्थ्यांना रविवार (ता. २२)पर्यंत अर्ज दाखल करता येणार आहेत.

अकरावी प्रवेशाच्‍या ऑनलाइन नोंदणीप्रक्रियेला उत्‍स्‍फूर्त प्रतिसाद मिळतोय. मंगळवारी दुपारी चारपर्यंत नोंदणी झालेल्या चौदा हजार ७०० विद्यार्थ्यांपैकी दहा हजार ५१६ विद्यार्थ्यांनी अर्ज लॉक करण्याचा पर्याय निवडला. तर आठ हजार ३४४ विद्यार्थ्यांनी पडताळणी प्रक्रिया पूर्ण केली. मंगळवारपासून अर्जाचा भाग दोन भरण्याची प्रक्रियादेखील सुरू झाली. याअंतर्गत एक हजार ५३१ विद्यार्थ्यांनी शाखा, महाविद्यालय पसंतीक्रम नोंदविण्याची प्रक्रिया पूर्ण केलेली होती. नव्‍याने अर्ज करण्यासोबत यापूर्वी अर्ज केलेल्‍या विद्यार्थ्यांना अर्जाचा भाग दोन भरण्यासाठी रविवारी (ता. २२)पर्यंत मुदत असेल.

आयसीएसईच्‍या विद्यार्थ्यांना सूचना

दरम्‍यान, आयसीएसई बोर्डाच्‍या विद्यार्थ्यांकरिता महत्त्वाचे सूचनापत्रक मंगळवारी जारी करण्यात आले. यानुसार ज्‍या विद्यार्थ्यांना बेस्‍ट फाइव्‍हचा लाभ घ्यायचा असेल, त्‍यांनी ग्रुप एक, ग्रुप दोनमधील सहा विषयांपैकी कोणतेही पाच विषयांचे बेस्‍ट फाइव्‍ह गुण ग्राह्य धरावे किंवा दुसऱ्या पर्यायात ज्‍या विद्यार्थ्यांना ग्रुप तीनमधील गुण विचारात घेण्‍याची इच्‍छा आहे, अशा विद्यार्थ्यांचे ग्रुप एक, ग्रुप दोन व ग्रुप तीनमधील सात विषयांची (सातशे गुण) सरासरी ग्राह्य धरली जाईल