नांदगाव (जि. नाशिक) : कोब्राच्या (Cobra) नुसत्या चाहुलीने अनेकांची त्रेधातिरपीट उडते. येथून जवळच असलेल्या बेलदारवाडी घातोडी शिवारात कोंबड्याच्या (chickens) खुराड्यात भक्ष्य शोधण्यासाठी चक्क कोब्रा घुसला. कोब्रा बघून कोंबड्यानी एकच गलका केला. (cobra in chicken cage Nashik News)

मध्यरात्री तीनच्या सुमारास खुराड्यातील कोंबड्यांचा जिवाच्या आकांताने होणारा गलका ऐकून जवळच घराबाहेर खाटेवर झोपलेल्या तुकाराम तांबे यांची झोपमोड झाली. कोंबड्यांचा आवाज का होतो, हे बघण्यासाठी त्यांनी टॉर्च लावून बघितले तर खुराड्याच्या आत कोंबड्या एकमेकांवर उड्या मारत होत्या. रात्री तीनला सर्पमित्र विजय बडोदे यांना मदतीसाठी बोलावण्यात आले. बडोदे यांनी तत्काळ घटनास्थळी येऊन खुराडा उघडला आणि बघितले तर आत चार ते पाच फूट लांबीचा कोब्रा होता. चार ते पाच कोंबड्या मृतावस्थेत दिसून आल्या. तर बाकीच्या कोंबड्या दंश झाल्याने उड्या मारत होत्या. खुरड्यातील एकेक कोंबड्या बाहेर काढल्यानंतर बडोदे यांनी कोपऱ्यात फणा काढलेल्या कोब्राला रेस्क्यू केले. त्यानंतर नैसर्गिक अधिवासात सोडले.