मालेगाव : येथील आगारातून मालेगाव ते नाशिक बस मोठ्या प्रमाणात धावतात. येथील आगारातून नाशिककडे जाणाऱ्या बसमध्ये १२ वर्षीय मुलगा हरवला होता. वाहकाने स्वखर्चाने त्याचे तिकीट काढून त्याला आई-वडिलांच्या स्वाधीन केले. वाहकाच्या या माणुसकीचे सर्वत्र कौतुक होत आहे. आगारातर्फे गुलाबपुष्प देऊन वाहक हेमंत शेवाळे यांचा सत्कार करण्यात आला आहे.

येथील आगाराच्या मालेगाव-नाशिक बसमधून गोवर्धन प्रशांत निकम (वय १२) हा शालेय विद्यार्थी प्रवास करीत होता. तिकीट काढण्यासाठी गेलेल्या वाहकाला बघून गोवर्धन सीटाखाली लपून बसला. वाहक हेमंत शेवाळे यांनी तिकिटासाठी विचारणा केली असता, गोवर्धनने मालेगावला मावशीला भेटायला आलो.

पाकीट हरवले, तिकीट काढायला पैसे नाही, असे सांगून रडायला सुरवात केली. श्री. शेवाळे यांनी त्याची शाळेची बॅग तपासली असता, त्यात पुस्तके आढळून आली. श्री. शेवाळे यांनी स्वखर्चाने नाशिकचे तिकीट काढून दिले.

माहितीवरून नाशिक येथील रुंगठा हायस्कूलमध्ये संपर्क साधला असता, शुक्रवारी गोवर्धन शाळेत आला नाही, असे शाळेतर्फे सांगण्यात आले. त्यानंतर शाळेतून त्याच्या आई-वडिलांचा मोबाईल नंबर घेऊन त्यांच्याशी संपर्क साधला असता ते रडायला लागले.

गोवर्धन मालेगाव-नाशिक बसमध्ये सुखरूप असल्याचे सांगितल्यानंतर त्याच्या आई-वडिलांच्या आनंदाला पारावार उरला नाही. नाशिक बसस्थानकात गोवर्धनला त्याच्या आई-वडिलांच्या स्वाधीन करण्यात आले. निकम दांपत्याने वाहक शेवाळे व चालक डी. डी. धोंडगे यांचे आभार मानले.