अंबासन, (जि.नाशिक) : येथील बिजोरसे शिवारात अल्पभूधारक शेतक-याच्या शेतात धुडगूस करीत अज्ञात माथेफिरूने चक्क शेतातील कपाशीचे पीक (Cotton Crop) उपटून टाकल्याची धक्कादायक बाब समोर आली आहे.

शेतातील कपाशीची झालेली नासधूस (Demolished) पाहुन शेतकरी महिलेने टाहो फोडत आक्रोश केला. संबंधित माथेफिरूविरोधात जायखेडा पोलिस ठाण्यात शेतकरी कुटुबियांनी तक्रार दाखल केली असून कठोर कारवाईची मागणी केली आहे. (cotton field demolished by unknown mad man nashik crime latest marathi news)

बिजोरसे शिवारात अल्पभूधारक शेतकरी प्रल्हाद लुकडू कोर व मुलगा योगेश हे गट क्रमांक १५१ क्षेत्रात शेती करतात. शेतात मोठ्या कष्टाने ठिबक संचाचा वापर करून कपाशी लागवड केली होती.

काही दिवसांत कपाशीला फुलोरा व कैरी येऊ लागताच अज्ञात माथेफिरूने काही अंशी हिरवीगार कपाशी उपटून फेकल्याने कोर कुटुंबियात संताप व्यक्त केला जात आहे. संबधित माथेफिरूने रात्रीतून प्रथम शेतातील घराचा वीजपुरवठा खंडित केला.

त्यानंतर कपाशीच्या शेतात धुडगूस करीत कपाशी उपटून फेकल्याचे शेतकरी कुटुंबियांनी सांगितले. सकाळी कुटुंबातील सदस्यांना ही बाब लक्षात येताच त्यांनी गावातील सुज्ञ नागरिकांच्या निदर्शनास आणून दिले.

मोठ्या कष्टाने लागवड केलेली कपाशीची नासधूस पाहुन भागाबाई कोर यांनी टाहो फोडात आक्रोश केला. अर्थिकसह शारीरिक संकटांचा सामना करत दिवस रात्र मेहनत करून शेतात लावलेले कपाशीचे पीक अज्ञात माथेफिरूने उपटून टाकल्याने परिसरात संताप व्यक्त केला जात आहे.

बिजोरसे येथील पोलीस पाटिल अविनाश मोरे यांनी पाहणी करून कुटुंबियांचे सांत्वन केले. योगेश कोर यांनी जायखेडा पोलीस ठाण्यात तक्रार दाखल केली असता हवालदार नानाजी पाटिल व शिवाजी गुंजाळ यांनी शेतात भेट देऊन पाहणी केली.

पिंकाचे नुकसान करणा-या अज्ञात माथेफिरूचा शोध घेऊन कठोर कारवाईची मागणी शेतकरी कुटुंबियांनी केली असून पुढिल तपास सहाय्यक पोलीस निरीक्षक श्रीकृष्ण पारधी यांच्या मार्गदर्शनानुसार पोलीस हवालदार शिवाजी गुंजाळ करीत आहेत.