नाशिक : नाशिक मर्चंट बँकेने मार्चअखेर ६६ कोटी ९५ लाख रुपयांचा ढोबळ नफा मिळविला आहे. सर्व आवश्यक तरतुदी वजा करून ४१.२३ कोटींचा निव्वळ नफा झाला आहे. बँकेच्या ठेवींमध्ये गत महिनाभरात तब्बल १८४ कोटींनी वाढ झाली असून एकूण २१८४ कोटींवर पोचल्या आहेत अशी माहिती नामको बँकेचे अध्यक्ष सोहनलाल भंडारी, उपाध्यक्ष रंजन ठाकरे, जनसंपर्क संचालक अशोक सोनजे यांनी पत्रकार परिषदेत दिली. बँकेच्या सभासदांना यंदा १५ टक्के इतका लाभांश देण्याचा मानस असल्याचेही भंडारी यांनी यावेळी सांगितले. (Gross profit of 66 crore to Nashik NAMCO Bank news)

बँकेने यंदा एकत्रित व्यवसाय ३२२३.९८ कोटींवर नेऊन ठेवला आहे. यंदाच्या वर्षात बँकेने १०३९ कोटींचे कर्जवाटप केले आहे. गतवर्षीच्या तुलनेत ९७ कोटीने कर्जवाटप वाढले आहे. बँकेची गुंतवणुक १४४८.६५ कोटी इतकी आहे. राखीव निधीत गतवर्षीच्या तुलनेत वाढ होऊन ३९५.५० कोटी निधी जमा आहे.

२९४.९१ कोटींपैकी ९५.३६ कोटींची वसुली झाली आहे. बँकेचा ढोबळ एनपीए ५.९० टक्के असून निव्वळ एनपीए शून्य टक्के आहे. इंडिया रेटिंग या रिझर्व्ह बँकेच्या मान्यताप्राप्त संस्थेकडून बँकेने रेटिंग करून घेतले असून सदर संस्थेने (लॉन्ग टर्म स्टेबल) ग्रेड दिलेली आहे.   (latest marathi news)

विद्यार्थ्यांना शैक्षणिक सुविधेसाठी बँकेने विना तारण ५० लाख रुपयांची कर्ज सुविधा उपलब्ध करून दिली असल्याची माहिती भंडारी यांनी दिली आहे. पत्रकार परिषदेस संचालक वसंत गिते, हेमंत धात्रक, प्रफुल्ल संचेती, विजय साने, ललित मोदी, प्रकाश दायमा, उल्हास सातभाई,अविनाश गोठी, नरेंद्र पवार, आकाश छाजेड, प्रशांत दिवे, मुख्य कार्यकारी अधिकारी विश्राम दीक्षित आदी उपस्थित होते.

दुरावलेले ग्राहक यांना आकर्षित करण्यासाठी बँकेने ग्राहकांना ८.५ टक्के वेलकम रेट देऊ केला आहे. महिला उद्योजकांना ३५ टक्के व पुरुष उद्योजकांना २५ टक्क्यांपर्यंत सबसिडी मिळणार आहे. तसेच बँकेने कर्जदाराला विना जामीनदार कर्ज उपलब्ध करण्याची सुविधा उपलब्ध केली आहे. यामुळे बँकिंग क्षेत्रात अशा प्रकारे कर्ज देणारी नामको बँक पहिली बँक ठरणार असल्याचा दावा अध्यक्ष भंडारी यांनी केला.