नाशिक - महापालिका आयुक्त रमेश पवार यांनी गुरुवारी (ता. १४) पूर्व, पश्चिम व पंचवटी विभागात सुरू असलेल्या तसेच कार्यारंभ आदेश देणे बाकी असलेल्या कामांची पाहणी केली. त्यात कामाच्या गुणवत्तेवर लक्ष ठेवण्याचे निर्देश आयुक्तांनी दिले. बांधकाम विभागातर्फे शहरातील विविध भागात सुरू असलेल्या विकासकामांची पाहणी गुरुवारी सकाळी साडेसातला केली. साधारण चार तासांच्या पाहणी दौऱ्यात श्री. पवार यांनी पूर्व, पश्चिम व पंचवटी विभागात सुरू असलेल्या कामांची गुणवत्ता राखली जाऊन वेळेत व गतीने कामे पूर्ण होण्याच्या दृष्टीने गती देण्याचे निर्देश शहर अभियंता नितीन वंजारी व बांधकाम विभागाच्या अधिकाऱ्यांना दिले.

आयुक्त पवार यांनी नाशिक पूर्व विभागातील मुंबई नाका ते हॉटेल छान जवळील शिवाजीवाडी घरकुल योजनेचा ३० मीटर डीपी रस्ता, इंदिरानगर बोगदा ते साईनाथ नगर चौफुली, वडाळा चौफुली ते एचपी गॅस गोडाऊन रविशंकर मार्गापर्यंत, सावता माळी मार्ग, एचपी गॅस गोडाऊन जंक्शनपासून रविशंकर मार्गाने के. के. वाघ इंग्लिश स्कूल जवळील प्रस्तावित क्रीडा संकुल कामाची पाहणी करण्यात आली. सावता माळी मार्ग ते नाशिक- पुणे महामार्गांपर्यंत प्रस्तावित कामांची पाहणी केली. पोतदार शाळेपासून उजव्या बाजूने प्रस्तावित काँक्रिट रोडची पाहणी केली. पश्चिम विभागातील बाळासाहेब ठाकरे इतिहास संग्रहालय येथे उद्यान रिक्रिएशन सेंटर विकसित करणे, विसे चौक ते कुसुमाग्रज स्मारक रस्ता अस्तरीकरण करणे, कुसुमाग्रज स्मारक ते गंगापूर नाका गांगुर्डे हॉस्पिटल दरम्यानचा रस्ता खडीकरण करणे, चोपडा लॉन्स ते डॉ. केकाण हॉस्पिटल (जोशीवाडा) रस्ता अस्तरीकरण करणे, घारपुरे घाट गोदावरी नगर येथे बोट क्लब बांधणे, पंचवटी विभागातील नाट्यगृह इमारत व त्यालगतचा रस्ता काँक्रिटीकरण करणे, गुंजाळ बाबानगर पुलाचे रुंदीकरण करणे यासह प्रभाग ६ मधील कामांची पाहणी करण्यात आली.