लासलगाव : लासलगाव ते नाशिक आणि लासलगाव ते चांदवड या मार्गावर प्रतिदिन दोन बसच्या अतिरिक्त फेऱ्या सुरू करण्यात येत आहेत, अशी माहिती लासलगाव बस आगारप्रमुख सविता काळे यांनी दिली. लासलगाव बस आगारात सविता काळे यांनी अधिकारी अशोक महाजन यांच्यासह सर्व चालक व वाहकांची बैठक घेतली.

नागरिक, महिला व शालेय विद्यार्थ्यांचे हाल होणार नाहीत, अशा पद्धतीने बससेवा सुरू करावी व सौजन्यपूर्ण वागणूक द्यावी, अशा सूचना सविता काळे यांनी केल्या. (Nashik 2 MSRTC buses daily from Lasalgaon to Chandwad marathi news)

लासलगाव ते चांदवड मार्गावर बसफेऱ्या कमी आहेत, अशी प्रवासी संघटना, शालेय विद्यार्थ्यांची मागणी होती. त्यामुळे या मार्गावर अतिरिक्त दोन बसफेऱ्या सुरू करण्यात आली आहे. लासलगाव येथून नाशिकला जाण्यासाठी व नाशिकहून लासलगावला येण्यासाठी दोन अतिरिक्त बसफेऱ्या वाढविण्यात आल्याचे आगरप्रमुख सविता काळे यांनी सांगितले.

"लासलगावला काॅलेज, शाळा सुटल्यानंतर अपुऱ्या बसमुळे विद्यार्थी रस्त्यावर उभे राहतात. जीव धोक्यात घालून खासगी वाहनांची मदत घेत असल्याचे चित्र दिसते. बसची कमी संख्या हेच कारण आहे. बस संख्या वाढवावी. महामंडळाने विद्यार्थ्यांच्या जीवनाशी खेळ खेळू नये."

-राजेंद्र राणा, उद्योजक, लासलगाव

"केवळ बससेवा नसल्याने लासलगावला विद्यार्थ्यांचे अतोनात हाल होत आहे. केवळ तटपुंज्या बस वाढवून हा प्रश्न सुटणार नाही. सध्या परीक्षेचे दिवस आहेत. त्यामुळे विद्यार्थ्यांचे शैक्षणिक नुकसान होणार नाही, याची काळजी संबंधित विभागाने घ्यावी, अन्यथा शिवसेनेला वेगळ्या मार्गाने विचार करावा लागेल."-शिवा सुराशे, माजी सभापती, पंचायत समिती, निफाड (Latest Marathi News)