नाशिक : शहरातील मोकाट व भटक्या जनावरांना अपघात झाल्यास किंवा आजारी पडल्यास रुग्णालयापर्यंत त्यांची वाहतूक करण्यासाठी रुग्णवाहिकेची सुविधा पशुसंवर्धन विभागाकडून करण्यात आली आहे. १३. २२ लाख रुपये खर्चाच्या प्रस्तावाला महासभेने मान्यता दिली असून, पशू रुग्णवाहिकेसाठी टोल फ्री क्रमांकदेखील उपलब्ध करून दिला जाणार आहे. (Nashik Animal Ambulance of NMC marath news)

शहरात मोठ्या प्रमाणात भटक्या व मोकाट जनावरांची संख्या वाढली आहे. रस्त्यावरील अपघातामुळे प्राण्यांवर उपचार करणे कठीण होऊन जाते. उपचार मिळत नसल्याने प्राणी गमावण्याची शक्यता अधिक असते. त्याचबरोबर आजारी असलेल्या प्राण्यांमुळे इतर प्राण्यांना संसर्ग होण्याची शक्यता असते.

त्यामुळे वेळेवर उपचार होण्यासाठी महापालिकेकडून प्राण्यांची रुग्णवाहिका उपलब्ध करून दिली जाणार आहे. पशुसंवर्धन विभागाकडून ही रुग्णवाहिका उपलब्ध करून दिली जाणार असून यामुळे प्राण्यांवर उपचार करता येणार आहे. रुग्णवाहिकेत सलाईन, लसीकरण, प्राथमिक उपचाराचीदेखील सोय उपलब्ध करून दिले जाणार आहे.

या रुग्णवाहिकेबरोबर पशुवैद्यकीय अधिकारी तसेच चार कर्मचारी राहतील रुग्णवाहिकेद्वारे शासकीय पशुवैद्यकीय दवाखान्यात प्राण्यांना उपचारासाठी नेले जाणार आहे, पशुसंवर्धन विभागाच्या वतीने रेबीज लसीकरण मोहीम व प्राण्यांसाठी अन्य मोहिमा राबविल्या जातात, रुग्णवाहिकेच्या माध्यमातून यासाठी उपयोग होणार आहे.

प्राण्यांच्या रुग्णवाहिकाशी संपर्क करण्यासाठी पशुसंवर्धन विभागाकडून टोल फ्री क्रमांक जाहीर केला जाणार आहे. शहरात आजारी अपघातग्रस्त मोकाट व भटक्या जनावरांना उपचारासाठी कोणती क्रमांकाचा उपयोग होईल. टोल फ्री क्रमांकाची सेवा मोफत राहणार आहे.