Nashik ZP News : गेल्या आठवड्यात दोनदा वेळ निश्चित होऊनही मुहूर्त हुकलेले जिल्हा परिषदेचे अंदाजपत्रक मंगळवारी (ता. २७) सादर करण्यात येणार आहे. या अंदाजपत्रकात दिव्यांगांसह नावीन्यपूर्ण योजनांवर भर असून, त्यासाठी विशेष तरतूद करण्यात आली असल्याचे मुख्य कार्यकारी अधिकारी आशिमा मित्तल यांनी सांगितले.

जिल्हा परिषदेच्या क्रीडा व सांस्कृतिक कार्यक्रम महोत्सवासामुळे २०२४-२५ या आर्थिक वर्षात सादर होणाऱ्या अंदाजपत्रकाचा खेळ झाला. (Nashik Budget will be presented by zp administrator today)

लेखा व वित्त विभागाकडून तयार झालेले अंदाजपत्रक सादर करण्यासाठी सतत वेळ बदलली गेली. दोनदा प्रशासनाने तारखा जाहीर करूनही त्या पुढे ढकलल्या. लेखा व वित्त विभागाने दोन आठवडे मॅरेथॉन बैठका घेत अंदाजपत्रक तयार केले.

मात्र, ते सादर करण्यासाठी प्रशासनाला वेळ मिळत नसल्याचे दिसत होते. अंदाजपत्रक सादर करण्यासाठी मंगळवारचा मुहूर्त काढला आहे. यंदाच्या अंदाजपत्रकात विविध योजनांसाठी वाढीव तरतूद करण्यात आली आहे. यात नावीन्यपूर्ण योजनांनाही स्थान देण्यात आले आहे.

यापूर्वी मित्तल यांनी सुपर ५० सारख्या नावीन्यपूर्ण योजनांसह आधुनिक तंत्रज्ञानाने युक्त प्रशासकीय कामकाज करण्याच्यादृष्टीने अंदाजपत्रकात तरतुदी केल्या होत्या. त्यामुळे यंदाच्या अंदाजपत्रकात नावीन्यपूर्ण योजनांचा समावेश असणार आहे.

गतवर्षी ४६.२ कोटींच्या अंदाजपत्रकास मंजुरी देण्यात आली होती. आता जिल्हा परिषदेच्या मुख्य लेखा व वित्त अधिकारीपदी भालचंद्र चव्हाण यांची नियुक्ती झाली असून, नाशिक जिल्हा परिषदेचे पहिल्यांदाच ते अंदाजपत्रक सादर करणार आहेत.

मुख्य कार्यकारी अधिकारी यांच्या दालनात अर्थसंकल्पीय सभा होणार असून, यात अंदाजपत्रक सादर केले जाईल.