नाशिक : देशातील एकमेव नंदी नसलेले शिवमंदिर म्हणून प्रसिद्ध असलेल्या नाशिकच्या कपालेश्वर मंदिरात यंदा महाशिवरात्रीनिमित्ताने भाविकांना प्रसाद म्हणून ५१ हजार रुद्राक्षांचे वाटप करण्यात येणार आहे. मंदिर विश्वस्त समितीने महाशिवरात्रीच्या पार्श्वभूमीवर नेपाळमधून हे रुद्राक्ष मागविले आहेत. (nashik Distribution of Rudraksha in Kapaleshwar Temple on Maha Shivratri marathi news)

महाशिवरात्रीनिमित्त कपालेश्वर मंदिरात दरवर्षी हजारोंच्या संख्येने भाविक दर्शनासाठी येतात. महाशिवरात्रीला पहाटे ४ वाजता दुग्धाभिषेक, दुपारी ३.३० वाजता पालखी, पहाटे ४ वाजेपासून भाविकांना दर्शन घेता येईल. पहाटे ४ ते दुपारी १२ वाजेपर्यंत दुग्धाभिषेक करण्यात येईल.

सकाळी 8 वाजता संस्थान विश्वस्तांच्या वतीने रुद्राभिषेक करण्यात येणार आहे. रात्री १० वाजता पालखी मिरवणूक मंदिरात परत आल्यावर महाआरती होईल. रात्री ११.३० ते पहाटे ४ वाजेपर्यंत महाअभिषेक व महापूजा, आरती करण्यात येणार आहे. या सोहळ्यानिमित्त मंदिरावर विद्युत रोषणाई, फुलांची सजावट केली जाणार आहे. भाविकांनी महाशिवरात्रीनिमित्त आयोजित सर्व कार्यक्रमांचा लाभ घ्यावा, असे आवाहन मंदिर विश्वस्त समितीने केले आहे. (Latest Marathi News)

पहिल्या पायरीवर लाइव्ह दर्शनाची सोय

मंदिरात होणारी गर्दी तसेच ज्येष्ठ, दिव्यांग भाविकांना पायऱ्या चढण्यासाठी होणारी अडचण लक्षात घेता श्री कपालेश्वर महादेव मंदिर संस्थानच्या वतीने मंदिराच्या पहिल्या पायरीवर टीव्ही स्क्रीनद्वारे भाविकांना लाइव्ह दर्शनाची कायमस्वरूपी सुविधा उपलब्ध करून देण्यात येत आहे. महाशिवरात्रीला या उपक्रमाचे लोकार्पण करण्यात येईल.

"महाशिवरात्रीला मंदिर २४ तास दर्शनासाठी खुले असेल. दर्शन घेण्यासाठी कोणत्याही प्रकारची अडचण निर्माण होणार नाही असे नियोजन केले आहे. भाविकांच्या काही सूचना असेल तर त्यांनी संस्थान कार्यालयाला संपर्क करावा."

- ॲड प्रशांत जाधव, अध्यक्ष, संस्थान श्री कपालेश्वर महादेव मंदिर, नाशिक