पिंपळगाव बसवंत : ‘संडे हो या मंडे रोज खाओ अंडे’, असे म्हटले जाते. यामुळे नाश्त्यामध्ये अनेक जण अंड्यांचा वापर करतात. हिवाळ्यात तर अंड्याला चांगलीच मागणी असते. थंडी वाढू लागल्याने अंड्याचे भाव आता वाढू लागले आहेत.

आवक कमी आणि मागणी वाढल्याने काही दिवसांपूवीं ६० रुपये डझन मिळणाऱ्या अंड्यांचे दर आता ८० ते ८५ रुपयांवर गेले आहेत. (Nashik Egg Price Hike Increase in price of eggs cold weather increase winter update)

थंडीत वाढ झाल्यानंतर दरात अजून वाढ होण्याची शक्यता आहे. अंड्याचे उत्पादन घटले आहे. त्यामुळे मागणीच्या तुलनेत पुरवठा कमी होत आहे.

पिंपळगाव शहरात अंड्याचे भाव डझनाला ८० ते ८५ रुपयांपर्यंत पोचले आहेत, तर गावरानी अंड्यांचा दर १३० ते १४० रुपये आहे. मागील वर्षी कोंबड्यांचे उत्पादन वाढले होते.

परिणामी, अंड्याचेही उत्पादन वाढल्याने भाव घटले होते. याचा फटका लहान शेतकरी आणि पोल्ट्री उत्पादकांना बसला. त्यांनी यंदा या व्यवसायात कमी गुंतवणूक केली.

त्यामुळेच उत्पादन घटले आहे. कोंबडीच्या खाद्याच्या दरातही विक्रमी वाढ झाली आहे, त्याची झळ ग्राहकांच्या खिशाला बसू लागली आहे.

यंदा अंड्याचे उत्पादन ४० टक्क्यांपर्यंत घटले आहे. अनेक पोल्ट्रीधारक आर्थिक अडचणीत सापडल्याने त्यांनी नव्याने पक्षी आणले नाहीत.

"कोंबडीचे खाद्य महागले असून, उत्पादनही कमी झाले आहे. परिणामी, अंड्याच्या दरात वाढ झाली आहे. सध्या किरकोळ बाजारात अंडी प्रतिडझन ८० ते ८५ रुपये झाले आहेत. एका अंड्यासाठी ७ रुपये मोजावे लागत आहे. आता थंडी वाढल्यानंतर अजून भाववाढीची शक्यता आहे. कारण मागील वर्षी अधिक उत्पादन झाल्याने अंड्याचे दर कमी होते."

- जावेेद पठाण, अंडी विक्रेता