नाशिक : दुचाकी चालवताना हेल्मेट आणि कार चालविताना सीटबेल्टचा नियमित वापर केला पाहिजे. कुटुंबीयांच्या सुरक्षेसाठी वाहतूक नियमांचे पालन करावे. प्रवासाला जाण्यापूर्वी वाहनाच्या चाकातील हवा, ब्रेक ऑईलसह इतर तपासणी करून घ्यावी, असे आवाहन माजी महापौर तथा औद्योगिक महाराष्ट्र कामगार सेनेचे अध्यक्ष अशोक मुर्तडक यांनी केले. (Nashik ex mayor Ashok Murtadak marathi news)

रस्ता सुरक्षा व कामगारांच्या परिवाराची सुरक्षा या दृष्टिकोनातून माजी महापौर अशोक मुर्तडक यांच्या वाढदिवसानिमित्त मंगळवारी (ता.२७) दुपारी ३.३० वाजता मोटार वाहन विभाग, औद्योगिक महाराष्ट्र कामगार सेना, बजाज सन्स लि. सातपूर आणि ऑल इंडिया फेडरेशन ऑफ मोटार व्हेईकल डिपार्टमेंट टेक्निकल एक्झिक्युटिव्ह ऑफिसर्स असोसिएशन यांच्याकडून बजाज सन्स कंपनीत मोफत हेल्मेट वाटप झाले.

त्यावेळी ते बोलत होते. यावेळी कंपनीतील सर्व स्टाफ व ३२५ कामगारांना मोफत हेल्मेट वाटले. कामगारांनी हेल्मेट परिधान करून कंपनी परिसरात फेरी काढली. यावेळी कंपनीचे एमडी सुमीत बजाज, एचआर जीएम ललित देवनहल्ली, नाशिकचे तत्कालीन प्रादेशिक परिवहन अधिकारी वासुदेव भगत, मोटार वाहन निरीक्षक सचिन बोधले, नरेंद्र जाधव, सहायक मोटार वाहन निरीक्षक प्रवीण सोनवणे, नमिता सानप, औद्योगिक कामगार सेनेचे सेक्रेटरी संजय बुटे, नितीन कातकाडे, प्रदीप बगाटे, राकेश बोरसे, योगेश चंद्राजे, वाल्मीक आहिरे आदी उपस्थित होते. (Latest Marathi News)