NMC News : गोदाआरती पुरोहित संघाने करावी की रामतीर्थ समितीने यावरून गेल्या अनेक दिवसांपासून सुरू असलेल्या वादाला वेगळे वळण मिळाले. महापालिकेने पूर्वीच संघाच्या ताब्यात असलेले वस्त्रांतरगृह थकबाकीमुळे ताब्यात घेण्याची प्रक्रिया सुरू केली आहे. वस्त्रांतरगृह ताब्यात घेतल्यानंतर ते पाडण्याचीदेखील तयारी सुरू केली आहे. ( Municipal Corporation )

पंचवटी विभागीय कार्यालयाने ताब्यात घेण्यासाठी मिळकत विभागाकडे प्रस्ताव पाठविला. १९९२ मध्ये महापालिकेने कुंभमेळ्याच्या पार्श्वभूमीवर रामकुंडाच्या बाजूला वस्त्रांतरगृह बांधले. गोदावरीमध्ये स्नानासाठी आलेल्या महिलांना कपडे बदलण्याची सुविधा उपलब्ध होण्यासाठी वस्त्रांतरगृहाची उभारणी करण्यात आली होती.

मात्र, येथे पुरोहित संघाने वस्त्रांतरगृहाचा ताबा घेतला. महापालिकेने तीन वर्षासाठी पुरोहित संघाला नाममात्र भाडे तत्त्वावर करारान्वये दिले. करारनामा तीस वर्षांपूर्वी संपुष्टात आला. मात्र असे असले तरी दावा सोडला नाही. त्याशिवाय भाडेदेखील थकविण्यात आले. महापालिकेकडून अनेकदा नोटीस बजावण्यात आले, मात्र प्रतिसाद मिळाला नाही.

मात्र गेल्या काही दिवसांपासून गोदाआरतीवरून वाद निर्माण झाल्यानंतर वस्त्रांतरगृह चर्चेत आले. करारनाम्यातील अटीवर शर्तींचा भंग झाल्याचे कारण महापालिकेच्या पंचवटी विभागीय कार्यालयाने ताब्यात घेण्याची कारवाई सुरू केली आहे. या संदर्भात मिळकत विभागाकडे प्रस्ताव सादर केला असून, लवकरच ताब्यात घेण्याची कारवाई केली जाणार आहे.काही दिवसांपासून गोदाआरतीवरून वाद सुरू आहे.

पुरोहित संघाने रामतीर्थ समितीमार्फत गोदा आरतीला विरोध केला आहे. यामागे राजकारण असल्याचे बोलले जात आहे. गोदा आरती हा भाजपचा कार्यक्रम असताना याच पक्षाचे माजी आमदार पुरोहित संघाच्या बाजूने उभे राहिले आहे. यासंदर्भात पक्षश्रेष्टीकडे स्थानिक पातळीवरून अहवालदेखील सादर झाला आहे त्या पार्श्वभूमीवर महापालिकेकडून कारवाई सुरू झाल्याचे बोलले जात आहे.