Nashik Crime News : छत्रपती शिवाजी महाराज यांचा जन्मोत्सव अवघ्या काही दिवसांवर येऊन ठेपला आहे. पंचवटी शिवजन्मोत्सव समितीने पंचवटी कारंजा येथे बहुचर्चित अयोध्या येथील राममंदिराची भव्य प्रतिकृती साकारण्यात येत आहे. याचे काम अंतिम टप्प्यात आले असून, दिवसरात्र हे काम सुरू असल्याचे समितीचे अध्यक्ष ॲड. गौरव गोवर्धने यांनी सांगितले. (Grand Replica of Ayodhya Ram Mandir)

दरवर्षीप्रमाणे विविध उपक्रमांनी शिवजन्मोत्सव साजरा केला जाणार आहे. येथील पूर्णाकृती छत्रपती शिवाजी महाराजांच्या पुतळ्याभोवती भव्य राममंदिराची प्रतिकृती साकारण्याचे काम सुरू आहे. यासाठी मुंबई येथील ४० कारागीर दिवसरात्र मेहनत घेत आहेत.

राममंदिर साकारण्यासाठी विविध प्रकारचे मॉल्डस युद्धपातळीवर बनवले जात आहेत. ४५ फूट उंच, तर ५० फूट लांब ही प्रतिकृती साकारली जात आहे. येत्या १ ते २ दिवसांमध्ये देखाव्याचे काम पूर्णत्वास जाणार असून, त्यावर आकर्षक व विविध रंगांची विद्युत रोषणाई केली जाणार असल्याची माहिती गोवर्धने यांनी दिली.

तर मालेगाव स्टॅन्ड येथील शिवजन्मोत्सव समितीतर्फे देखावा उभारणी कामाला प्रारंभ करण्यात आला आहे. मंडळातर्फे यंदा ६६ फूट उंच किल्ल्याची प्रतिकृती तयार करून त्यात २० फूट उंच महालक्ष्मी मूर्ती व त्यापुढे अश्वारूढ छत्रपती शिवाजी महाराज यांचा पुतळ्याचा देखावा उभारण्यात येणार असल्याचे बाबासाहेब राजवाडे यांनी सांगितले.

पंचवटी कारंजा येथे रविवारी (ता. १८) रात्री प्रख्यात शिवव्याख्याते प्रा. नितीन बानगुडे- पाटील यांचे व्याख्यान आयोजित करण्यात आले आहे. सोमवारी (ता. १९) शिवजयंतीनिमित्त मोफत आरोग्य व रक्तदान शिबिराचे आयोजन करण्यात आले आहे. या वर्षी ज्येष्ठ नागरिकांची मोफत नेत्र तपासणी करून त्यांना चष्मेवाटप केले जाणार आहे.