नाशिक : महापालिकेकडून नव्याने देण्यात आलेल्या श्वान निर्बिजिकरणात एका श्‍वानामागे महापालिकेला १ हजार ६५० रुपये मोजावे लागणार आहे. ॲनिमल वेल्फेअर बोर्डाच्या नियमानुसार वाढ करण्यात आल्याने अडीच पट अधिक रुपये महापालिकेला मोजावे लागणार आहे. नाशिक रोड व पंचवटी विभागासाठी काम देण्यात आले असून सिडको, सातपूर, पूर्व व पश्चिम विभागात निविदा प्रक्रियेला प्रतिसाद मिळाला नाही. (Nashik NMC dog sterilization marathi news)

महापालिकेच्यावतीने २००७ पासून श्‍वान निर्बीजीकरणाची प्रक्रिया राबविली जाते. सोळा वर्षात महापालिकेने एक लाखांहून अधिक श्वान निर्बीजीकरण करण्यात आले आहे. मागील वर्षी देखील श्वान निर्बीजीकरणाचे काम देण्यात आले होते. परंतु ॲनिमल वेल्फेअर बोर्डाच्या मार्गदर्शक सूचनांनुसार वेल्फेअर बोर्डाचे प्रमाणपत्र असणे बंधनकारक केले आहे.

परंतु मागील ठेका ज्या संस्थेने घेतला होता. त्या संस्थेकडे प्रमाणपत्र नसल्याने तातडीने काम बंद करण्यात आले. मागील वर्षी प्रतिश्वान निर्बीजीकरण करण्यासाठी ६५० रुपये इतका दर होता. ॲनिमल वेल्फेअर बोर्डाने ३५ टक्के वाढ करून प्रति शस्त्रक्रिया ९९८ रुपये इतका दर मंजूर केला आहे. (Latest Marathi News)

त्यानुसार पंचवटी व नाशिक रोड विभागासाठी प्रति श्‍वान शस्त्रक्रियेसाठी १६५० रुपये न्यूनतम दर आला आहे. उत्कर्ष ग्लोबल फाउंडेशनला निर्मिती करण्याचे काम मिळाले आहे. २ हजार ४२४ श्‍वानांवर शस्त्रक्रिया करण्यासाठी ४० लाख रुपयांच्या खर्चाला मंजुरी देण्यात आली.

प्रतिसादाअभावी काम बंद

सिडको, सातपूर, नाशिक पूर्व व पश्चिम विभागासाठी देखील निविदा प्रक्रिया राबविण्यात आली होती. परंतु या भागात श्‍वान निर्बीजीकरण प्रक्रियेला प्रतिसाद मिळाला नाही. त्यामुळे या चार विभागांसाठी नव्याने फेरनिविदा प्रक्रिया राबविली जाणार आहे. ॲनिमल वेल्फेअर बोर्डाने निविदा व अटी-शर्ती तयार केले आहे. त्यानुसार पात्र संस्थांना काम दिले जात आहे.