सिडको : ‘कोरोना नियम पाळा व कोरोना टाळा’ असे वारंवार केंद्र व राज्य शासन सांगत असतानादेखील या नियमांची पुरती विल्हेवाट लावण्याचे काम दस्तुरखुद्द दुसरे तिसरे कोणी नव्हे, तर दस्तुरखुद्द केंद्रीय आरोग्य राज्य मंत्रीच करत असल्याचे चित्र सिडकोतील एका लकी ड्रॉ कार्यक्रमात नागरिकांना याची देही याची डोळा बघायला मिळाले. यामुळे कोरोना गेला की काय, असा प्रश्न निर्माण झाला आहे.

कोरोना पहिल्या व दुसऱ्या लाटेत देशात व राज्यात मोठ्या प्रमाणात जीवित व वित्तहानी झाली. ऑक्सिजनचा अभाव, मोठ्या प्रमाणात आर्थिक खर्च, गोळ्या औषधांचा तुटवडा, स्मशानभूमीत लागलेल्या प्रेतांच्या रांगा ही सर्व दृश्य एखाद्या भयावह चित्रपटांप्रमाणे नागरिकांना बघायला मिळाली. आता पुन्हा तिसऱ्या लाटेसाठीची शक्यता सरकार अधूनमधून वर्तवित आहे. याकरिता कोरोना नियमांचे पालन करा, असे वारंवार आवाहन करत आहे. असे असतानाही ज्याठिकाणी कोरोनाच्या नियमांचे पालन होत नाही, त्या ठिकाणी नागरिकांवर गुन्हेदेखील दाखल करण्यात येतात. आजही ते नियम कायम आहे. परंतु, या नियमांमध्ये प्रशासन दुजाभाव करत असल्याचे दिसून येत आहे.

नुकतेच सिडकोमध्ये भाजप मंडल अध्यक्षांनी एका लकी ड्रॉ कार्यक्रमाचे आयोजन केले होते. त्याकरिता शुक्रवारी (ता.१७) रात्री केंद्रीय आरोग्य राज्यमंत्री डॉ. भारती पवार या विनामास्क दिसून आल्या. गर्दीचे नियम धाब्यावर बसविण्यात आले. एका केंद्रीय आरोग्य मंत्र्यांच्या उपस्थितीत अशाप्रकारे नियमांचे उल्लंघन व्हावे, याबाबत उपस्थित नागरिकांनीदेखील नाराजी व्यक्त केली. विशेष म्हणजे येथे पंतप्रधान यांच्या वाढदिवसानिमित्त केक कापण्यात आला. अशावेळी लहान मुलांना सुद्धा धोक्यात ठेवण्यात आले. विशेष म्हणजे मंत्र्यांनीदेखील मास्क घातल्या नसल्याचे दिसून आले. प्रशासनाच्या दुजाभावामुळे नागरिकांनी नाराजी व्यक्त केली आहे