नाशिक : केंद्र सरकारच्या पंतप्रधान पथविक्रेता आत्मनिर्भर निधी (पीएम) (pm street vendor atmanibhar nidhi) योजनेंतर्गत महापालिका हद्दीत आतापर्यंत बारा हजार ३६८ पथविक्रेत्यांना बारा कोटी ३१ लाख रुपयांचे कर्ज वितरण करण्यात आले असून, योजनेंतर्गत कर्ज घेतलेल्या पथविक्रेत्यांपैकी अन्न पदार्थ विकणाऱ्या फेरीवाले अंतर्गत कर्जाचा लाभ घेतला आहे. अशा सर्व खाद्यपदार्थ विक्रेत्यांना ऑर्डर मिळण्यासाठी स्विगी (Swiggy) व झोमॅटो (Zomato) कंपन्यांसोबत जोडले जाणार आहे.

केंद्र सरकारकडून पथविक्रेत्यांसाठी ‘स्वनिधी से समृद्धी’ अभियान सुरू करण्यात आले आहे. यात पथविक्रेते व त्यांच्या कुटुंबीयांना पीएम मातृ वंदना योजना, जननी सुरक्षा योजना, पीएम सुरक्षा बिमा योजना, पीएम जीवन ज्योती बिमा योजना, पीएम जनधन योजना, एम श्रम योगी मानधन योजना, वन नेशन वन रेशनकार्ड आदी आठ योजनांचा लाभ दिला जात आहे. नाशिक शहरात १२, ३६८ पथ विक्रेत्यांची सोशल इकॉनॉमी प्रोफाईल भरत राज्यात अव्वल स्थान मिळविले आहे. एकूण ५३,१५९ लाभार्थींपैकी पात्र लाभार्थीना या आठ योजनांचा बँक, जिल्हा पुरवठा विभाग, कामगार आयुक्त विभाग, आरोग्य विभागामार्फत २८,४२८ लाभार्थ्यांना लाभ दिला जात असल्याची माहिती महापालिकेच्या उपायुक्त करुणा डहाळे यांनी दिली.

डिजिटल व्यवहारावर कॅशबॅक

कर्ज मिळालेल्या पथविक्रेत्यांना डिजिटल व्यवहार करण्यासाठी प्रवृत्त केले जात आहे. त्यासाठी डिजिटल व्यवहार केल्यास प्रत्येक व्यवहारावर एक रुपया कॅशबॅक मिळणार आहे. त्यासाठी ‘भारत पे’ या पेमेंट अग्रीग्रेटरची नेमणूक करण्यात आली आहे. त्यासाठी पथविक्रेत्यांना क्युआर कोड देण्याबरोबरच व्यवहारासाठीचे प्रशिक्षण दिले जाणार आहे. त्याचबरोबर अन्नपदार्थ विक्री करणारे फेरीवालेअंतर्गत कर्ज घेतलेल्या विक्रेत्यांना अधिक ऑर्डर मिळण्यासाठी स्विगी व झोमॅटो कंपन्यांसोबत जोडले जाणार इच्छुक विक्रेत्यांनी स्विगी साठी ९०१५५००८०० व झोमॅटोसाठी ८०४६८१०३३० या क्रमांकावर फक्त मिस कॉल देण्याचे आवाहन करण्यात आले आहे.