मालेगाव (जि. नाशिक) : शहरातील तापमानाचा पारा वाढत असतानाच उन्हामुळे पाण्याची मागणी वाढली आहे. यातच सोयगाव व कॅम्प भागात एकांत बंगले, सोसायट्या व घरांमधून घरगुती वीजपंप चोरीला जाण्याचा घटना वाढल्या आहेत. वीजपंप चोरीमुळे नागरीक त्रस्त झाले आहेत.

शहरानजीकच्या सोयगाव, दाभाडी शिवार, नामपूर रोड, कलेक्टर पट्टा आदी भागात नागरी वस्ती वाढली असली तरी रस्ते, दळणवळण व अन्य सोयी- सुविधांचा अद्याप अभाव आहे. अमृत योजनेमुळे शहरातील सर्व भागात पाणीपुरवठा होत असला तरी कमी दाबाने पाणीपुरवठा होत असल्याने घरोघरी वीजपंप आहेत. हेच वीजपंप चोरट्यांच्या उत्पन्नाचे साधन ठरले आहेत. गेल्या आठवड्यात येथील विजया रेसिडेन्सी या इमारतीत तीन वेळा वीजपंप चोरीच्या घटना घडल्या. वीजपंप चोरीमुळे ऐन उन्हाळ्यात रहिवाशांना पाणीटंचाई सहन करावी लागते. शिवाय आर्थिक भूर्दंड सहन करावा लागतो. प्रामुख्याने पार्किंगमधून वीजपंप चोरीच्या घटना घडत आहेत. पोलिसांनी परिसरात गस्त वाढवून वीजपंप चोरट्यांना जेरबंद करावे, अशी मागणी होत आहे.