नाशिक : थकीत वीजबिलापोटी आदिवासी विकास विभागाच्या नाशिक प्रकल्प कार्यालयांतर्गत येणाऱ्या दहा आश्रमशाळांचा वीजपुरवठा खंडित करण्यात आला आहे. नंतर प्रकल्प कार्यालय स्तरावरून तत्काळ विजेचा भरणा करण्यात आला. मात्र, वीजपुरवठा खंडित करण्याची वेळ का आली? याबाबत संबंधित आश्रमशाळेच्या मुख्याध्यापकांकडे चौकशी केली जाणार आहे. (Power-supply-cut-off-Ashram-schools-nashik-marathi-news)

दहा दिवसांपासून वीजपुरवठा खंडित

राज्यात आदिवासी विकास विभागांतर्गत चालविल्या जाणाऱ्या शाळांचे वीजबिल, पाणीपट्टीसंदर्भात स्वतंत्र लेखाशीर्ष असून, त्यातून राज्यातील सर्व शाळा, वसतिगृहे, एकलव्य शाळांची बिले मागणी होताच तत्काळ भरली जातात. मात्र, नाशिक प्रकल्पांतर्गत येत असलेल्या दहा आश्रमशाळांचे वीजबिल न भरल्यामुळे वीजपुरवठा दहा दिवसांपासून खंडित झाला होता. सध्या आश्रमशाळा बंद असल्या तरी परिसरातील कर्मचारी अंधारात होते.

वीजपुरवठा सुरळीत

थकीत वीजबिलामुळे आश्रमशाळेचा पुरवठा खंडित केल्याची माहिती मिळताच नाशिक प्रकल्प स्तरावरून अपर आयुक्त कार्यालयाकडे निधीची मागणी करण्यात आली. मंगळवारी (ता. २२) सायंकाळी निधी मिळताच आश्रमशाळांची थकीत वीजबिले अदा करण्यात आली आणि रात्री उशिराने सर्व आश्रमशाळांचा वीजपुरवठा सुरळीत करण्यात आला.

अपर आयुक्त कार्यालयाच्या सूचना

अपर आयुक्त कार्यालयांतर्गत येणाऱ्या आश्रमशाळा व वसतिगृहांचे वीजबिल, पाणीपट्टी, घरपट्टी थकीत असेल आणि त्यासाठी निधीची गरज असेल, अशा आश्रमशाळा शिक्षकांनी तत्काळ मागणी करावी आणि वीजपुरवठा खंडित होणार नाही, याची काळजी घ्यावी, अशी सूचना अपर आदिवासी आयुक्त कार्यालयाने केल्या आहेत.

नाशिक प्रकल्प कार्यालयांतर्गत ८० शाळा असून, वीजबिलापोटी केवळ तीन आश्रमशाळांचा वीजपुरवठा खंडित झाला होता. या आश्रमशाळांचे थकीत वीजबिल अदा केले आहे. वीजपुरवठा खंडित झाल्यासंदर्भात संबंधित आश्रमशाळेच्या मुख्याध्यापकांकडे विचारणा केली जाणार आहे. -वर्षा मीणा, प्रकल्प अधिकारी, नाशिक