नाशिक : गेल्‍या दीड महिन्‍यापासून जिल्‍ह्यात निर्बंध लागू असल्‍याने अत्‍यावश्‍यक व जीवनावश्‍यक वस्‍तू सेवा मर्यादित वेळेसाठी उपलब्‍ध होत होत्‍या. दरम्यान रेड झोनमधून नाशिक बाहेर आल्‍याने मंगळवार (ता. १)पासून निर्बंध शिथिल करत सर्व दुकाने खुली करण्यास परवानगी दिली. मात्र, नागरिकांनी बाजारात तुडुंब गर्दी झाल्‍याने कोरोना संसर्ग बळवण्याचा धोका वाढला. जिल्ह्यात पॉझिटिव्‍हिटी रेट घटल्‍याने निर्बंध शिथिल केल्यावर, दोन दिवसात नागरिकांनी रस्त्यांवर मोठी गर्दी केली त्‍यामुळे कोरोनाचा प्रादुर्भाव वाढण्याचा धोका निर्माण झाला आहे.

लागणार पुरावा अन् ओळखपत्र

आता लॉकडाउनचे निर्बंध शिथील झाल्यानंतर दोन दिवसांपासून रस्त्यावर वाढलेल्या गर्दीला नियंत्रणासाठी प्रशासनाने शहर व जिल्ह्यात कोरोना संर्सगाचा प्रादूर्भाव रोखण्यासाठी प्रतिबंधात्मक उपायोजनांचा भाग म्हणून जिल्ह्यात १५ जून पर्यंत दुपारी ३ ते पहाटे ६ पर्यत कलम १४४ अंतर्गत जमावबंदी आदेश लागू केला आहे. त्यामुळे दुपारी तीननंतर सार्वजनिक ठिकाणी फिरण्यास मनाई करण्यात आली आहे.

आवश्यक कामांसाठी बाहेर पडणाऱ्या नागरिकांनी ओळखपत्र व सबळ पुरावे सोबत ठेवावे लागणार आहेत. आपत्ती व्यवस्थापन प्राधिकरणाचे अध्यक्ष, जिल्हाधिकारी सूरज मांढरे यांनी १५ जून सकाळी ०७.०० वाजेपर्यंत नाशिक जिल्ह्यात निर्बंध लागू केले आहेत. प्रतिबंधात्मक उपायोजनांचा भाग म्हणून जिल्ह्यात १५ जून पर्यंत नागरिकांना दुपारी ३ ते सकाळी ६ वाजेपर्यंत सार्वजनिक ठिकाणी फिरण्यास मनाई असेल. अत्यावश्यक कारणासाठी व्यक्तींनी बाहेर पडतांना फोटो ओळखपत्र तसेच बाहेर पडण्याचे कारण स्पष्ठ करण्यासाठी सबळ पुरावादर्शक कागदपत्रे जवळ बाळगावी लागणार आहे. सार्वजनिक, खाजगी बस वाहतूक, रिक्षा, चारचाकी व दुचाकी वाहने नागरिकांना परवानगी दिलेल्या कामासाठी वापरता येतील.