पंचवटी (नाशिक) : ‘मंदिर हम खुलवायेंगे, धर्मको न्याय दिलायेंगे’ अशी हाक देत भाजप (BJP) आध्यात्मिक आघाडीने आजच्या गोकुळाष्टमीच्या (gokulashtami) पार्श्‍वभूमीवर राज्यव्यापी शंखनाद आंदोलनाची हाक दिली. मंत्रभूमी असलेल्या नाशिकमध्येही आध्यात्मिक आघाडीतर्फे आंदोलन करण्यात आले.

‘मंदिर हम खुलवायेंगे, धर्मको न्याय दिलायेंगे’

कोरोना उद्रेकामुळे (coronavirus) गेल्या दोन वर्षांपासून राज्यातील सर्वच प्रमुख मंदिरे बंद आहेत. त्याविरोधात रणशिंग फुंकण्यासाठी भाजप आध्यात्मिक आघाडीतर्फे आज (ता. ३०) सकाळी साडेआठ वाजता रामकुंडावर शंखनाद आंदोलन होणार असल्याची माहिती भाजप आध्यात्मिक आघाडीचे राज्याध्यक्ष तुषार भोसले (tushar bhosale) यांनी दिली होती. या वेळी नागरिकांसह साधू, संत, विविध मंदिराचे पुजारी उपस्थित राहून शंखनादाद्वारे राज्य शासनाचा निषेध केला. ज्येष्ठ समाजसेवक अण्णा हजारे यांनी शासनाच्या मंदिर बंदच्या धोरणावर कडाडून टीका केली. राज्यातील मंदिरे उघडण्यासाठी आंदोलन उभारावे, असा सल्ला देत त्यानंतरही मंदिरे न उघडण्यास राज्यव्यापी जेलभरो आंदोलन करा, त्याआंदोलनात आपणही सहभागी होऊ, अशी ग्वाहीही अण्णांनी काल राळेगण सिद्धी येथे बोलताना दिली. नगरच्या मंदिर बचाव समितीने त्यांची भेट घेऊन याप्रश्‍नी लक्ष घालण्याचे आवाहन केल्यावर अण्णांनी संबंधितांना मंदिरे उघडण्यासाठीच्या आंदोलनाबाबत आश्‍वस्त केले.

राज्यव्यापी आंदोलन

राज्य सरकारने एकीकडे मॉल, बार सुरू करण्यास परवानगी दिलेली आहे, परंतु लाखो कोट्यवधी हिंदू धर्मीयांची श्रद्धास्थाने उघडण्याबाबत चालढकल चालविली आहे. याविरोधात राज्यव्यापी शंखनाद आंदोलनाची हाक दिल्याचे आघाडीचे अध्यक्ष तुषार भोसले यांनी सांगितले. आंदोलनासाठी शहरातील विविध आखाड्यांचे प्रमुख, प्रमुख मंदिरांचे विश्‍वस्त, पुजारी वर्गासह भाविकांनीही मोठ्या संख्येने सहभागी होऊन आंदोलनाला बळकटी द्यावी, असे आवाहन भोसले यांनी केले.