सिडको (नाशिक) : विशेष पोलिस अधिकारी (Special police officers) हे पोलिसांचे मदतनीस म्हणून काम करत आहेत. त्यांना नागरिकांना (citizens) मारण्याचा कुठल्याही प्रकारचा अधिकार नसल्याची स्पष्टोक्ती पोलिस आयुक्त दीपक पांडे (deepak pandey) दिली. सिडकोतील विशेष पोलिस अधिकाऱ्यांना मार्गदर्शन करताना आयोजित कार्यक्रमात संवाद साधताना ते बोलत होते.

विशेष पोलिस अधिकाऱ्यांना नागरिकांना मारण्याचा अधिकार नाही

कोरोना दुसऱ्या लाटेमुळे लॉकडाउन सुरू आहे. अशा परिस्थितीत काही लोक, तसेच टवाळखोर विनाकारण रस्त्यांवर किंवा चौकाचौकात फिरताना आढळून येत आहेत. त्यांना पोलिस प्रशासनातर्फे काठीचा प्रसाददेखील दिला जात आहे. कोरोना प्रादुर्भाव कमी करण्यासाठी प्रशासनातर्फे संपूर्ण शहरात ही मोहीम राबवली जात आहे. अशातच पोलिसांसमवेत खांद्याला खांदा लावून विशेष पोलिस अधिकारी म्हणून तरुण वर्ग कुठल्याही प्रकारचा मोबदला न घेता कर्तव्य बजावताना दिसून येत आहेत. त्यांचे मनोबल वाढविण्याकरिता आयुक्तांनी माऊली लॉन्स येथे विशेष पोलिस अधिकाऱ्यांशी संवाद साधला. या वेळी उपायुक्त पौर्णिमा चौगुले, विजय खरात, अमोल तांबे, सहाय्यक आयुक्त दीपाली खन्ना, मोहन ठाकूर, समीर शेख, सोहेल शेख, अंबडचे वरिष्ठ पोलिस निरीक्षक कुमार चौधरी, निरीक्षक कमलाकर जाधव, श्रीकांत निंबाळकर आदींसह अंबडचे अधिकारी, कर्मचारी, विशेष पोलिस अधिकारी उपस्थित होते.