इगतपुरी (जि. नाशिक) : तालुक्यातील मुकणे येथील ग्रामपंचायत सदस्य रामभाऊ राव यांच्या आई अनुसयाबाई यांच्या गळ्यातील दीड लाखाचे सोन्याचे दागिने (gold jewelry) दुचाकीवरून आलेल्या चोरट्यांनी (Thieves) दिवसाढवळ्या गळ्यातून ओरबाडून पळविले. ही घटना सोमवारी (ता. ३०) कावनई शिवारात घडली. (Thieves looted women jewelry at Igatpuri Nashik Crime News)

मुकणे (ता. इगतपुरी) येथील ग्रामपंचायत सदस्य रामभाऊ राव व त्यांचे कुटुंब कावनई रोडवरील वाघोबावाडी व बळवंतराव वाडीकडे जाणाऱ्या रस्त्यालगत शेतावर राहतात. तेथे त्यांचे किराणा दुकान आहे. दुपारी घरी कोणी नसल्याने त्यांची आई अनुसयाबाई राव दुकानावर थांबल्या होत्या. दुपारी दीडच्या सुमारास दोन जण दुचाकीवरून आले. बिस्किट पुडे घेण्याच्या बहाण्याने एकजण दुकानावर गेला व एक गाडीवरच थांबून होता.

अनुसयाबाई यांच्या गळ्यातील दोन सोन्याच्या पोती (अंदाजे किंमत दोन लाख) गळ्यातून हिसकावून दोघांनीही गाडीवरून पलायन केले. अनुसयाबाई यांनी आरडाओरडा केला. मात्र चोरटे दुचाकीवरून पसार झाले. या घटनेमुळे परिसरात घबराट पसरली आहे. श्रीक्षेत्र कावनईजवळच असल्याने या रस्त्यावर नेहमीच वर्दळ असते. शहरी भागात कायम होणाऱ्या घटनांची पुनरावृत्ती ग्रामीण भागातही होऊ लागल्याने त्याचा वेळीच घोटी पोलिसांनी बंदोबस्त करावा, अशी मागणी जोर धरत आहे.