नाशिक : एसटी कर्मचारी संपाचे पडसाद कायम असले तरी काही आगारांतून तुरळक प्रमाणात एसटी बस सोडल्‍या जात आहेत. बुधवारी (ता.८) नाशिक विभागातून तीस बसगाड्या धावल्‍या. दरम्‍यान आणखी दहा कर्मचाऱ्यांची बदली केल्‍याचीही माहिती मिळते आहे.

बुधवारी नाशिक विभागातील सात आगारातून एकूण तीस बसगाड्या सोडण्यात आल्‍या. यात खासगी शिवशाही व लालपरीचा समावेश आहे. नाशिक आगाराअंतर्गत येणाऱ्या नवीन सीबीएस बसस्‍थानकाहून पुणे, धुळे, डोंबिवली व औरंगाबादसाठी खासगी शिवशाही सोडल्‍या जात आहेत. नाशिक आगारातून एकूण अठरा गाड्या सुटल्‍या. लासलगावहून सहा, येवल्‍यातून दोन तर इगतपुरी, पिंपळगाव बसवंत आणि सिन्नर आगारातून प्रत्‍येकी एक बसगाडी सुटल्‍याची माहिती मिळते आहे. संपात सहभागी असलेल्‍या दहा कर्मचाऱ्यांवर बदलीची कारवाई करण्यात आली आहे.