चांदवड (जि. नाशिक) : उत्तर महाराष्ट्रातील जळगाव, नाशिक, नंदुरबार जिल्ह्यांना अवकाळी पावसाने तडाखा दिला आहे. त्यामुळे, पिकांचे मोठे नुकसान झाले. शेतकऱ्यांच्या हातातोंडाशी आलेला घास हिरावून घेतला गेला आहे. विजांच्या गडगडाटासह सुरु झालेल्या पावसाचा तडाखा सर्वांनाच जाणवू लागला आहे.

तरुण शेतकऱ्याचा वीज पडून मृत्यू

चांदवड तालुक्यातील वाकी बुद्रुक येथील तरुणाचा वीज पडून मृत्यू झाला आहे. ही घटना आज (ता. 09) सकाळी साडेसहा वाजता घडली. या घटनेत तरुण शेतकरी कैलास सूर्यभान कवडे यांचा जागीच मृत्यू झाला. तरुणाच्या मृत्यूने सर्वत्र हळहळ व्यक्त केली जात आहे. मृतदेह चांदवड उपजिल्हा रुग्णालयात नेण्यात आला असून पुढील पंचनामा सुरू आहे.

रात्री विजांच्या कडकडाटासह झालेल्या अवकाळी पावसामुळे जिल्ह्यात गहू, हरभरा, मका पिकांचे सुमारे साडेपाच हजार हेक्टरचे नुकसान झाल्याचा प्राथमिक अंदाज कृषी विभागाने वर्तविला आहे.

जिल्ह्यातील एकुण परिस्थिती अशी -

* इगतपुरीत अवकाळी पावसाचा कहर. पहाटे चार पासून मेघगर्जनेसह धुव्वादार सुरू.

* घोटीसह परिसरात पहाटेपासून वीजेच्या कडकडाटसह अवकाळी पावसाची सुरुवात.

* सिन्नर तालुक्यात सकाळ पासून काही भागात रिमझिम पाऊस, विजांचा कडकडाट सुरू.

* मौजे सुकेने व कसबे सुकेने परिसरात विजेच्या कडकडाटासह जोरदार पाऊस.

* पालखेड, रानवड, नांदुर्डी (ता.निफाड) परिसरात विजेच्या कडकडाटासह जोरदार पावसाला सुरुवात. अवकाळी पावसामुळे द्राक्ष बागायतदार शेतकरी संकटात.

* नैताळे परिसरात विजेच्या कडकडाट अन् वादळ- वाऱ्यासह जोरदार पावसाला सुरूवात. द्राक्ष, कांदा, गहु उत्पादक शेतकरी हवालदिल.